ఇక సామాను సర్దుకోండి-షర్మిల?

Posted: 04/23/2013 07:22 PM IST

ఖమ్మం: రక్షణ స్టీల్స్, బయ్యారం గనుల్లో తనకు వాటాలున్నాయని రుజువు చేస్తే తాను పాదయాత్రను ఆపేస్తానని, నిరూపించలేకపోతే తెలుగుదేశం పార్టీ అధ్యక్షుడు నారా చంద్రబాబు నాయుడు తప్పును ఒప్పుకోవాలని వైయస్సార్ కాంగ్రెసు పార్టీ నాయకురాలు షర్మిల సవాల్ విసిరారు. మూడున్నరేళ్లుగా రాష్ట్రాన్ని పరిపాలిస్తున్న కాంగ్రెస్ పాలకులకు విలువలు లేవని, ప్రజలను ఇబ్బందులు పెట్టడమే లక్ష్యంగా పని చేస్తున్నారని ఆమె విమర్శించారు. ప్రజాసమస్యలపై ప్రభుత్వాన్ని నిలదీయాల్సిన ప్రతిపక్ష నేత చంద్రబాబు నాయుడు కాంగ్రెస్ పార్టీతో కుమ్మక్కై ప్రభుత్వాన్ని కాపాడుతున్నాడని ఆరోపించారు. రిజిస్ట్రేషన్ చార్జీలు, వ్యాట్, విద్యుత్ చార్జీలు పెంచి ప్రజలపై కాంగ్రెస్ ప్రభుత్వం భారాలు మోపుతున్న చంద్రబాబు కేవలం ప్రకటనలకే పరిమితం అవుతున్నాడని ఆగ్రహం వ్యక్తం చేశారు. రక్షణ స్టీల్స్ విషయంలో తొలుత అభ్యంతరం తెలిపింది తానే అని టిడిపి ఎమ్మెల్యే రేవంత్ రెడ్డి అన్నారు. గిరిజనుల సంపద ను దోచుకునేందుకు ఖనిజాభివృద్ది సంస్థను అడ్డం పెట్టుకున్నారని, ఆ విషయం తాను శాసనసభలో చెప్పానని, వై.ఎస్. తన అల్లుడు కోసం ఇది చేస్తున్నారని అప్పుడే వెల్లడించానని ఆయన అన్నారు. కొండలరావు అనే వ్యక్తికి 500 కోట్ల పెట్టుబడి పెట్టగల ఆర్ధిక స్థోమత ఉందా అని ఆయన ప్రశ్నించారు. వై.ఎస్.అల్లుడు అనిల్ కు కొండలరావు బినామీ అన్నారు. రక్షణ స్టీల్ సంస్థ చిరునామా, అనిల్ కు చెందిన మిరాకిల్ ఫార్ములేషన్ సంస్థ చిరునామా కూడా సోమాజీగూడలోనే ఉందని, అవి అనిల్ బినామీలు కాకపోతే రెండు ఆఫీస్ లు ఒకే చిరునామా లో ఎలా ఉంటాయని ఆయన ప్రశ్నించారు.ఇప్పటికైనా షర్మిల ఒప్పుకోవాలని, సామాను సర్దుకుని ఇంటికి వెళ్లాలని రేవంత్ సూచించారు. ధైర్యం ఉంటే సిబిఐ విచారణకు దీనిపై ఒప్పుకోవాలని ఆయన డిమాండ్ చేశారు.