హైద్రాబాద్ లో అరెస్టైన ఆఫ్ఘన్ విద్యార్థి

Posted: 04/13/2013 10:17 AM IST

ఉస్మానియా విశ్వవిద్యాలయంలో ఇంజినీరింగ్ రెండవ సంవత్సరంలో చదువుతున్న నాయేల్ యూసఫి అనే విద్యార్థి అంబర్ పేటలో తను అద్దెకుంటున్న ఇంట్లో ఒక అమ్మాయి మీద అత్యాచారం జరిపిన నేరం మీద అరెస్టయ్యాడు.  ప్రైవేట్ కాలేజ్ లో పోస్ట్ గ్రాడ్యుయేషన్ కోర్స్ లో చదువుతున్న బాధితురాలు తార్నాకాలో అద్దె ఇంట్లో నివసిస్తోంది. 

ఉస్మానియా విశ్వవిద్యాలయం ఇన్ స్పెక్టర్ పి.అశోక్ తెలియజేసినదాని ప్రకారం, యూసఫి బాధితురాలిని నెల రోజులుగా తనతో స్నేహం చెయ్యమని అడుగుతున్నాడు.  ఆమె అందుకు ఇష్టపడటంలేదన్న విషయం స్పష్టంగా చెప్పినా, అతను వెంబడించటం మానలేదు.  చివరకు తనను తాను అంతం చేసుకుంటానని బెదిరించాడు కూడా.  బుధవారం రాత్రి యూసఫి ఆమె ఇంటికి వెళ్ళి ఆ విషయం చర్చిస్తూ, వివరంగా మాట్లాడుకుందాం రమ్మని తన ఇంటికి ఆహ్వానించాడు.  అలా వస్తే సరే లేకపోతే ఇప్పుడే ప్రాణాలు తీసుకుంటానని బెదిరించేటప్పటికి ఆమె అతని మాటను ఒప్పుకుని అతని ఇంటికి వెళ్ళింది. 

రాత్రయింది ఇక వెళ్తానని ఆమె లేచేటప్పటికి, ఉండిపో నేను నిన్ను రేపు క్షేమంగా ఇంట్లో వదిలిపెడతానని మాటిచ్చాడతను.  కానీ మాట తప్పి అప్పటి వరకూ తన ప్రాణాలు తీసుకుంటానన్న మనిషి, ఆ రాత్రి ఆమె ఒప్పుకోకపోతే ఆమె పీక నులిమి చంపేస్తానని బెదిరించాడు.  గురువారం ఉదయం తన ఇంటికి వెళ్ళిన ఆమె స్నేహితులతో తనమీద జరిగిన అత్యాచారాన్ని వివరించి వాళ్ళందరి సలహాతో ఉస్మానియా విశ్వవిద్యాలయం పోలీస్ స్టేషన్లో ఫిర్యాదుచెయ్యగా పోలీసులు యూసఫి ని అదుపులోకి తీసుకున్నారు.  స్టేట్ మెంట్లు తీసుకుని దర్యాప్తు మొదలుపెట్టారు. 

అత్యాచారానికి ముందు నిందితుడు ఆమె అర్థనగ్న ఫొటోలను తీసాడని ఆమె చెప్పింది కానీ నిందితుడి నివాసంలో కెమెరా దొరకలేదని, కానీ అంతకు ముందు తీసిన చాలా ఫొటోలు అతని ల్యాప్ టాప్ లో లభించాయని పోలీసులు చెప్పారు. 

ఇంత వివరంగా ఇలాంటి కథనాలను రాయటమెందుకంటే ఆడపిల్లలు ఇవి తెలుసుకునైనా తమ జాగ్రత్తలో తాముంటారని.  నెల వరకూ వేచి చూసి, చచ్చిపోతానని బెదిరిస్తే భయపడి, అన్ని ఫోటోలను తీసుకోనిచ్చి, తన నివాసానికి వస్తే కూర్చోబెట్టి మాట్లాడటం, రమ్మంటే అతని నివాసానికి పోవటం, ఇంత బేలతనం పనికిరాదని చెప్పటం కోసమే. 

-శ్రీజ