Posted: 04/04/2013 11:18 AM IST

పన్నెండు సంవత్సరాలకోసారి వచ్చే కుంభమేలా రెండు నెలలపాటు త్రివేణీ సంగమంలో మార్చి 10 వరకూ జరిగింది. ఆ సమయంలో దేశ విదేశాల నుంచి అక్కడకు వచ్చిన భక్తులు, పర్యటకులతో కళకళాడిన ప్రదేశమంతా ఇప్పుడు చెత్తా చెదారంతో నిండిపోయి ఉంది. కానీ జనసంచారం లేకుండా లేదు. ఇప్పుడు అక్కడ మిగిలిపోయిన కాలుష్య వాతావరణంలో ఆరోగ్యాన్ని లెక్క చెయ్యకుండా, ప్రధూషణాలలోనే నిధులను అన్వేషించేవారితో నిండిపోయింది.

దేవాలయాలలోనూ, పుణ్య నదులలోనూ భక్తులు కానుకలను సమర్పించుకునే ఆనవాయితీ ఉన్న దేశం కనుక అంతమంది వచ్చినప్పుడు ప్రతివారూ కచ్చితంగా ఎంతో కొంత నాణేల రూపంలోనూ, బంగారం రూపంలోనూ గంగానదిలో వదిలిపెట్టేవుంటారని తెలుసు కాబట్టి, దొరికినంత చేతబుచ్చుకుందామని పిల్లాపాపలతో వచ్చి అదృష్టాన్ని పరీక్షించుకుంటున్నారు. ఆలయాల్లో హుండీలుంటాయి, వాటికి భద్రత, వాటిని తెరిచే అధికారంతో పాటు వినియోగించే అధికారాలున్న ఆలయ యాజమాన్యం ఉంటుంది. కానీ నదులలో ఇంకా అలాంటిదేమీ లేదు కాబట్టి భక్తులు వదిలి వెళ్ళినవాటిలో ఎవరికెంత దొరికితే అంత.

త్రివేణీ సంగమంలో మామూలు రోజుల్లో కూడా నీటిలో వదిలిన కొబ్బరికాయలను కూడా వదలకుండా ముందు నుంచే నీటిలో ఎదురుచూసేవాళ్ళున్నారు. అవే కొబ్బరికాయలను తిరిగి సగం రేటుకి దుకాణాలలో అమ్మేస్తారు.

అయ్యో పాపం అని భక్తులనుకుంటారు, పిచ్చోళ్ళు పాపం పారేసుకుంటున్నారు అని వీళ్ళు భక్తులననుకుంటారు. ధర్మం- అంటే చెయ్యవలసిన పుణ్య కార్యంలో పేదలకు పంచిపెట్టటం కూడా ఒక భాగంగా ఆచారమైంది. అందుకే ధర్మం చెయ్యండి బాబూ అంటూ మీ ధర్మాన్ని మీకు గుర్తు చేస్తారు భిక్షకులు.

ఉత్తర భారతదేశంలో దీపావళి తర్వాత మిగిలిపోయిన మిఠాయిలను, బాణాసంచాను కూడా చెత్తలోపడేస్తే అందులో వెతుక్కునేవాళ్ళెందరో కనిపిస్తారు. ఈ దృశ్యాలను చూస్తే సాటి మానవులను మనం కలుపుకోకుండా ముందుకు వెళ్తున్నామేమో అనే భావన చాలామందికి తాత్కాలికంగానైనా కలుగుతుంది, ఇది ప్రగతిమార్గమేనా అన్న ప్రశ్న ఉదయిస్తుంది.  

 

-శ్రీజ