Posted: 03/24/2013 03:21 PM IST

 

పురుషులలో తగ్గిపోతున్న వీర్యకణాల ఉత్పత్తి

అందుకు కారణాలు మానసిక వత్తిడి, జీవన శైలి, తీసుకునే ఆహార పదార్థాలు ఇవన్నీ వీర్యకణోత్పత్తి ని తగ్గిస్తాయని ఎండోక్రైనాలజిస్ట్ ప్రియా కణ్ణన్ చెన్నైలో జరిగిన ఒక సదస్సులో పేర్కొన్నారు. వీర్యకణాలు కావలసినంత ప్రమాణంలో పురుషులలో ఉత్పత్తి కావటం లేదని జన్యు సంబంధిత వైద్యులు అభిప్రాయపడ్డారు.

ఆండ్రోలజిస్ట్ పి.ధర్మరాజ్ మాట్లాడుతూ, సెల్ ఫోన్ల అధిక వాడకం, ఒళ్ళో లాప్ టాప్ లు పెట్టుకుని పనిచెయ్యటం వలన శరీరానికి చేరుతున్న రేడియేషన్ వలన కూడా వీర్యకణాలు తగ్గిపోతున్నాయన్నారు. ఇదే కాక బయట తినే ఫాస్ట్ ఫుడ్ లు, సేవించే ఆల్కహాల్, సిగరెట్ల ప్రభావం కూడా బాగా పడుతోందని కేరళ క్రాఫ్ట్ ఫెర్టిలిటీ సెంటర్ కి చెందిన ధర్మరాజ్ అన్నారు.

అజూ స్పెర్మయా అంటే వీర్యకణాలు లేకుండా ఉండటం. ఇందులో రెండు రకాలున్నాయి ఒకటి అబ్ స్ట్రక్టివ్ అజూస్పెర్మియా అనే శారీరక స్థితి. ఇందులో వీర్యకణాలు విడుదలయ్యే మార్గం మూసుకుపోయి ఉంటుంది కాబట్టి వీర్యకణాలు ఉత్పత్తి కావు. నాన్ అబ్ స్ట్రక్టివ్ అజూస్పెర్మయా లో అలా మార్గం మూసుకపోయిన స్థితి లేని కారణంగా అటువంటి పురుషులకు చికిత్స ద్వారా వీర్యకణాల ఉత్పత్తిని పెంచవచ్చని మెడికల్ డైరెక్టర్ మొహమ్మద్ అష్రఫ్ అన్నారు.

ఈ చికిత్సలో, పురుషుల వృషణాల నుంచి చురుకైన వీర్యకణాలను తీసి వాటిని ఇంట్రాసైటోప్లాస్మిక్ స్పెర్మ్ ఇంజెక్షన్ ద్వారా గర్భాశయంలోకి జొప్పిస్తారు. అయితే ఈ విధానం అరుదైనది, కష్టమైనదని, అయినా దీన్ని చెన్నైలో ప్రారంభించామని చెప్తూ, ఏమైనా దంపతుల వీర్యకణాలనే వాడతాం కానీ వీర్యకణ దాతలనుంచి తీసుకోమని, అలా చెయ్యటం వలన భవిష్యత్తులో సమస్యలు ఎదురయ్యే అవకాశముంటుంది కాబట్టి ఆ పని చెయ్యమని డాక్టర్లు చెప్పారు.

ప్రస్తుతం ప్రభుత్వ హాస్పిటల్స్ లో అనుసరిస్తున్న ఇంట్రాటురైన్ ఇన్సెమినేషన్ విధానమని కానీ అది గర్భం దాల్చటానికి పూర్తి హామీని ఇవ్వలేక పోతున్నదని గైనకోలజిస్ట్ అన్నారు.

చికిత్సలు సరే కానీ ఈ సమస్యనుంచి బయట పడటానికి డాక్టర్లు సూచించిన విధంగా ఆహార పానీయాల సేవనాన్ని నియంత్రిస్తూ, రేడియేషన్ కలిగించే ఎలక్ట్రానిక్ వస్తువుల వాడకాలను సాధ్యమైనంత తక్కువ చేస్తే మంచిదేమో.