Posted: 03/24/2013 02:03 PM IST

విద్యుత్ సమస్య మీద గనక సోమవారం కూడా శాసనసభలో చర్చకు అనుమతించకపోతే మాక్ సభ నిర్వహిస్తామంటున్నారు తెలుగు దేశం పార్టీ నాయకుడు ఎర్రబెల్లి దయాకర్ రావు.

విద్యుత్ సమస్య చాలా గడ్డు సమస్యని, దాన్ని మించిన సమస్య మరేమీ ఉండదని, అందువలన దానిమీద శాసన సభలో చర్చకు అవకాశం కల్పించాలని తెలుగుదేశం పార్టీ శాసన సభ మొదలైన దగ్గర్నుంచీ కోరుతూనే వుంది. కానీ సభ మొదలవటం, ప్రతిపక్షాల వాయిదా తీర్మానాలను సభాపతి అంగీకరించకపోవటంతో ఆందోళనల మధ్య సభ సాగటం లేదని వాయిదా వెయ్యటం, తిరిగి ప్రారంభించగానే మళ్ళీ ఆందోళనలు, ఈ విధంగా శాసన సభ సజావుగా సాగిన సందర్భం బడ్జెట్ సమావేశాలు ప్రారంభమైన దగ్గర్నుంచి ఇంతవరకూ రాలేదు.

సభను సాగేట్టుగా చూసే బాధ్యత సభాపతి దని, కాంగ్రెస్ ప్రభుత్వం దాటవేసే దిశగానే సభను వాయిదాలు వేస్తున్నదని తెలుగు దేశం పార్టీ వాళ్ళు ఆందోళన చేస్తూ, శుక్రవారం నాడు సభ మూసివేసిన తర్వాత కూడా శాసన సభలో రాత్రి 11 గంటల వరకూ ఆందోళన కొనసాగిస్తూనే వున్నారు. నిన్న పాదయాత్ర చేస్తూ శాసన సభకు చేరుకుని తమ నిరసనను కూడా తెలియజేసారు.

ఇక ఉపేక్షించేది లేదని, రేపు సోమవారం విద్యుత్ సమస్య మీద చర్చను తీసుకోకపోతే మాక్ సభను నిర్వహించి అందులో ప్రభుత్వ వైఫల్యాలను ఎండగడతామని, దానితో పాటు ముఖ్యమంత్రి కిరణ్ కుమార్ రెడ్డి, సభాపతి నాదెండ్ల మనోహర్ నివాసాల ముందు ధర్నా చేస్తామని ఎర్రబెల్లి హెచ్చరించారు.