Posted: 01/31/2013 01:07 PM IST

క్రీడాకారులు పతకాలు సాధించటం కోసం కఠోర సాధన చేస్తారని అందరికి తెలుసు. అయితే  మాష్టార్ చెప్పినట్లు సాధన చేయటంతో   పతకాలు వస్తాయని క్రీడాకారులు అంటారు.  ఇప్పుడు  కోచ్ వల్లే పెద్ద సమస్య వచ్చింది. శిక్షణ పేరుతో .. క్రీడాకారులను చిత్రహింసలు చేస్తున్నారు.  జపాన్ లో  ఒక కోచ్ తన దగ్గర శిక్షణ పొందే క్రీడాకారులు విచిత్రమైన శిక్షలు వేస్తున్నాడట. అతను పెట్టే బాధలు భరించలేక ఆ క్రీడాకారులు  ఫిర్యాదు చేయటం జరిగింది. హెడ్ కోచ్ ర్యూజీ సొనొదా, అతని సహచరులు తమను చెంప దెబ్బలు కొట్టారని, కర్రలతో బాదారని ఒలింపిక్స్‌లో పాల్గొన్న జపాన్ మహిళా జూడో అథ్లెట్లు ఫిర్యాదు చేశారు. 15 మంది జూడోకా బృందం చేసిన ఫిర్యాదుపై అల్ జపాన్ జూడో సమాఖ్య (ఎజెజెఎఫ్) తీవ్రంగా స్పందించింది. వెంటనే ఈ సంఘటనపై విచారణ జరపాలని నిర్ణయించింది. ఇటీవల ఓ జూడోకా ఆత్మహత్య చేసుకోవడంతో జపాన్‌లోని జూడో శిక్షణ శిబిరాల్లో జరుగుతున్న వ్యవహారాలు ఒక్కొక్కటే వెలుగు చూస్తున్నాయి.

లండన్ ఒలింపిక్స్ సమయంలో హెడ్ కోచ్ సొనొదా తమను కొట్టాడని, అతని సహచరులు కూడా చేయి చేసుకున్నారని మహిళా జూడో అథ్లెట్లు ఫిర్యాదు చేయడం పరిస్థితి తీవ్రతకు అద్దం పడుతుంది. 2008 బీజింగ్ ఒలింపిక్స్‌లో మెరుగైన ప్రదర్శనతో జపాన్ జూడో బృందం నాలుగు స్వర్ణాలను సాధించింది. అయితే, లండన్ ఒలింపిక్స్‌లో ఒక స్వర్ణం, ఒక రజతం, మరో కాంస్య పతకంతో సరిపుచ్చుకుంది. దీనితో తీవ్రంగా ఆగ్రహించిన హెడ్ కోచ్ జపాన్ జూడో బృందంపై నిప్పులు చెరిగాడు. అంతటితో ఆగకుండా, మహిళా జూడోకాలపై చేయి చేసుకున్నాడు. అసిస్టెంట్ కోచ్‌లు, సహాయకులు కూడా వారిని కొట్టారు. అప్పట్లో జపాన్ క్రీడా మంత్రిత్వ శాఖ జూడోకాల వైఫల్యాలపై అసంతృప్తి వ్యక్తం చేయడంతో, వారు ఈ సంఘటనపై ఫిర్యాదు చేయడానికి సాహసించలేదు. అయితే, తాజాగా ఒక జూడో విద్యార్థి ఆత్మహత్య చేసుకోవడాన్ని జీర్ణించుకోలేకపోయిన మహిళా జూడోకాలు హెడ్ కోచ్‌పై ఫిర్యాదు చేశారు. తనపై కోచ్‌ల దాడుల నిత్యకృత్యమయ్యాయని వారు ఆరోపించారు. జపాన్ లో  శారీర శిక్షలను 1947 లోనే నిషేదించినా .. ఇప్పటికి  కొంత మంది టీచర్లు, కోచ్ లు క్రమశిక్షణ  పేరుతో  దండిస్తూనే ఉన్నారు.