Posted: 12/12/2012 10:05 AM IST

తెలంగాణ రాష్ట్ర సమితి అద్యక్షుడు కల్వకుంట్ల చంద్రశేఖర్ రావు ఇప్పుడు ఓ ఆసక్తికరమైన ప్రకటన చేశాడు. నిన్న తెలంగాణ పార్టీ కార్యాలయంలో జరిగిన సమావేశంలో మాట్లాడిన ఆయన రాష్ట్రంలో ఎప్పుడు ఎన్నికలు వచ్చినా, టీఆర్ఎస్ పార్టీ 75 అసెంబ్లీ స్థానాలు, 15 లోక్ సభ స్థానాలు గెలుస్తుందని ప్రకటించాడు. పల్లెబాట కార్యక్రమాన్ని పురస్కరించుకొని ప్రతి రెండు అసెంబ్లీ నియోజకవర్గాలకు ఒకరి చొప్పున నియమించిన పార్టీ సమన్వయకర్తల సమావేశం, గ్రేటర్ హైదరాబాద్‌లోని 150 డివిజన్ల 'నగర బాట' ఇన్‌చార్జిలు, 24 అసెంబ్లీ నియోజకవర్గాల పార్టీ ఇన్‌చార్జిల భేటీలు తెలంగాణభవన్‌లో వేర్వేరుగా జరిగాయి ఈ సందర్భంగా ఆయన పై విధంగా మాట్లాడాడు. ఇక హైదరాబాద్ లో తమ సత్తా ఏంటో కూడా చాటాలని, 15 రోజులు బస్తీ బస్తీకి తిరిగి తెలంగాణ ఉద్యమ ప్రాముఖ్యతను తెలియజేయాలని అన్నారు. ఇక తమ పార్టీ రోజు రోజుకు బలం పుంజుకుంటుందని, టీఆర్ఎస్ శ్రేణులు గట్టిగా శ్రమిస్తే వందకు వంద అసెంబ్లీ స్టానాలు, అన్నీ ఎంపీ స్థానాలు కూడా గెలిచే సత్తా ఉందని, అన్ని సర్వేలు ఈ విషయాన్ని స్పష్టంగా చెబుతున్నాయని అన్నారు. ఇక నుంచి హైదరాబాద్‌లో పార్టీ పనితీరును తానే పర్యవేక్షిస్తానని చెప్పారు. కాగా, ఈ సమావేశానికి హాజరుకాని పార్టీ బాధ్యులపై కేసీఆర్ ఆగ్రహం వ్యక్తం చేయటమే కాక, వారిని ఫోన్ చేసి మరీ పిలిపించారు. ఇక కేసీఆర్ తీరు చూస్తుంటే 2014 ఎన్నికల కోసం ఇప్పటి నుండే నడుం బిగించారని  అంటున్నారు. కేసీఆర్ లెక్క కరెక్టుగా వస్తుందో, లేక తప్పుతుందో చూడాలి.