Posted: 11/21/2012 04:03 PM IST

ఉగ్రవాది కసబ్  ఉరితీతపై పాకిస్థాన్  మీడియా ఆచితూచి వార్తలను ప్రచురించాయి. కసబ్ ఉరిశిక్షకు ఎక్కువ ప్రాధాన్యం ఇవ్వకుండా, అదే సమయంలో పూర్తిగా విస్మరించకుండా జాగ్రత్త పడుతున్నాయి. పాక్‌కు చెందిన ముఖ్యమైన వార్తా ఛానల్ జియో ఛానల్‌కు చెందిన జియో టివి వెబ్ సైట్లో ఇండియా హ్యాంగ్స్ ముంబై గన్‌మ్యాన్ అజ్మల్ కసబ్ అని రాసింది. మరో ప్రధాన పత్రిక డాన్‌కు చెందిన డాన్ వెబ్ సైట్ కసబ్‌ను ఉరితీసినట్లుగా భారత మీడియాలో వార్తలు వచ్చాయని రాసింది.మిగిలిన ప్రధాన, లోకల్ వెబ్ సైట్స్ కూడా అలాగే రాశాయి.

ముంబై దాడిలో పట్టుబడ్డ కసబ్‌ను భారత్ ఉరి తీసిందని, క్షమాభిక్ష దరఖాస్తును భారత రాష్ట్రపతి తిరస్కరించారని క్లుప్తంగా రాశాయి. కసబ్ ఉరిశిక్ష విషయాన్ని భారత ప్రభుత్వం ఫ్యాక్స్ ద్వారా పాకిస్థాన్‌కు పంపిచడంతో పాక్ ఈ అంశంపై స్పందించింది. భారత న్యాయ వ్యవస్థ నిర్ణయాన్ని గౌరవిస్తామని పాక్ తెలిపింది.

అయితే తీవ్రవాద సంస్థ లష్కరే తోయిబా కసబ్‌ ఒక హీరో అని అభివర్ణించింది. కసబ్ ఉరికి ప్రతికారం తీర్చుకుంటామని ప్రకటించింది. కసబ్‌ను స్ఫూర్తిగా తీసుకుని మరిన్ని దాడులు చేస్తామని చెప్పింది. భవిష్యత్తులో దాడులు చేయడానికి వెనకాడమని తెలిపింది. ఇదిలా ఉండగా, భారత్ నుంచి వచ్చిన కసబ్ మరణవార్త లేఖను తాము అందుకోలేదన్న విషయాన్ని పాకిస్తాన్ ఖండించింది. తమకు కసబ్ ఉరి గురించి సమాచారం అందిందని తెలిపింది. తీవ్రవాదాన్ని వ్యతిరేకిస్తామని, ఈ విషయంలో అన్ని దేశాలకు తమ సహకారం ఉంటుందని స్పష్టం చేసింది.