Posted: 05/30/2012 12:05 PM IST

విజయమ్మ బిడ్డ జైలుకెళ్లాడనే ఆవేదనకంటే ఆ 18 అసెంబ్లీ నియోజకవర్గాల ప్రజలు తమ పార్టీకే ఓట్లేయాలంటూ రాజకీయ ఉపన్యాసాలు చేయడమే వింతగా తలపిస్తోందన్నారు. నాడు ఊరూరా ప్యాలెస్‌లు కడుతుంటే మిన్నకున్న వైఎస్ విజయమ్మ ఇప్పుడు అక్రమార్జనల వ్యవహారం బద్దలై జగన్ జైలుకెళ్తే మాత్రం బాధపడుతుండటం విడ్డూరంగా ఉందని తెలుగుదేశం అధినేత నారా చంద్రబాబునాయుడు అభిప్రాయపడ్డారు. అంతంత సొమ్ము ఎలా వస్తోందంటూ ఆనాడే ఆరా తీయాల్సిన బాధ్యత తల్లిగా విజయమ్మకు లేదా అని బాబు సూటిగా ప్రశ్నించారు.

అయినాసరే పుత్రశోకం ఓ తండ్రిగా తనకూ తెలుసని పేర్కొన్నారు. నెల్లూరు ఎంపి లోక్‌సభ స్థానం పరిధిలోని అల్లూరు మండల కార్యకర్తల సమావేశంలో చంద్రబాబు పాల్గొని ప్రసంగించారు. ‘ విజయమ్మ జగన్‌ను పెంచిన విధంగా మీరు మీ బిడ్డల్ని పెంచవద్దంటూ’ సమావేశానికి హాజరైన మహిళలనుద్దేశించి సలహా ఇచ్చారు. వైఎస్ కుటుంబం వల్ల ప్రస్తుతం ఓ మంత్రితో సహా పారిశ్రామికవేత్తలు, ఐఏఎస్ అధికారులు మొత్తం 13 మంది వరకు జైళ్లలో మగ్గుతున్నారని ఆరోపించారు. చట్టం అందరికీ సమానమేనన్న సత్యాన్ని గ్రహించాలన్నారు. వైఎస్ ముఖ్యమంత్రిగా ఉన్నప్పుడు విధులు నిర్వహించిన ఐఏఎస్ అధికారులు చాలామంది ప్రస్తుతం జైలుపాలయ్యారన్నారని గుర్తు చేశారు. మిగిలిన మంత్రుల్ని, వైఎస్ పరిపాలనలో కీలక సూత్రదారిగా వ్యవహరించిన రాష్ట్ర ప్రభుత్వ సలహాదారుడు కెవిపిపై వెంటనే చర్యలు తీసుకోవాలని చంద్రబాబు డిమాండ్ చేశారు. జగన్ దోపిడీ చేసిన ధనం తిరిగి ప్రజలకే చెందాలని అభిప్రాయపడ్డారు. అధికారంలోకి రాగానే ఆ సొమ్మంతా రికవరీ చేస్తామంటూ వెల్లడించారు.