Posted: 02/22/2012 11:20 AM IST

మద్యం సిండికేట్లలో తనకు సంబంధం లేదని, ఈ వ్యవహారాన్ని ఇంతటితో ముగించాలని ఎక్సయిజ్‌ శాఖ మంత్రి మోపిదేవి వెంకటరమణ అన్నారు. ఈ అంశంలో తన పేరు పదేపదే ప్రస్తావనకు రావడం బాధేస్తోందని, దీనికి ఇంతటితో పుల్‌స్టాప్‌ పెట్టాలని తెలిపారు. ముఖ్యమంత్రి కిరణ్‌కుమార్‌రెడ్డితో ఆయన సమావేశమయ్యారు. మద్యం సిండికేట్ల వ్యవహారంలో ఎసిబికి పట్టుబడిన నున్నా రమణ మంత్రి మోపిదేవి వెంకటరమణకు పదిలక్షలు ఇచ్చినట్లు చెప్పిన విషయం తెలిసిందే. దీనిపై విచారణ జరుగుతున్న సమయంలో మరోసారి మంత్రి పేరును రమణ ప్రస్తావించినట్లు తెలిసింది. ఇద్దరు వ్యక్తుల చేత మంత్రికి డబ్బులు పంపినట్లు రమణ ఒప్పుకున్నట్లు తెలిసింది. దీనిపై గతంలోనే విచారణకు సిద్ధమని మంత్రి మోపిదేవి చెప్పారు. మద్యం సిండికేట్ల వ్యవహారంలో పేర్లు బయటపెట్టాలని సిఎంను కోరారు. ఈ నేపథ్యంలో మళ్ళీ తన పేరును ప్రస్తావించడంతో ఆయన సిఎంను కలిసి వివరణ ఇచ్చుకున్నారు. సిఎంను కలిసిన తర్వాత ఆయన మీడియాతో మాట్లాడారు. మద్యం సిండికేట్ల వ్యవహారంలో తనకు సంబంధం లేదని చెబుతూ వస్తున్నా మళ్ళీ ఎందుకు వస్తుందో అర్థం కావడం లేదని ఆవేదన వ్యక్తం చేశారు. మద్యంపై ఈ నెల 23న అసెంబ్లీలో చర్చకు వస్తున్నందున అదే రోజు సమాధానం చెబుతానని అన్నారు.

పదిలక్షలు తానే ఇచ్చినట్లు ఒకసారి, ఇద్దరు వ్యక్తుల చేత డబ్బులు పంపినట్లు మరోసారి రమణ చెప్పడంలోనే నిజమెంత ఉందో తెలుస్తోందన్నారు. తన పేరు పదేపదే ఎందుకు వస్తుందో తెలియడం లేదని, దీనివల్ల మానసికంగా కృంగదీస్తోందన్నారు. ఎసిబి తీరు ఇబ్బందికరంగా ఉందని, దీనికి ఇంతటితో పుల్‌స్టాప్‌ పెట్టాలని సిఎంతో చర్చించినట్లు చెప్పారు. ఎసిబి కావాలని చేస్తోందని, తన పేరు చెప్పడంపై కొన్ని అనుమానాలు వస్తున్నాయని ఎసిబి తీరును ఆయన తప్పుపట్టారు. మంత్రికి సంబంధం లేదని చెప్పిన మరో ఇద్దరి నుండి ఎసిబి వివరణ తీసుకోవడం పట్ల ఆగ్రహం వ్యక్తం చేశారు. ఈ విషయంలో ప్రతిపక్షాలు మాట్లాడకముందే తాను స్పందించానని, తనకు సంబంధం ఉంటే రాజీనామా చేస్తానని మొదటే చెప్పానని అన్నారు. మద్యం సిండికేట్ల వ్యవహారంలో తనకు సంబంధం లేదన్నారు. తాను ఎవరిపైనా అనుమానాలు వ్యక్తం చేయడం లేదన్నారు. పార్టీ ఆధిపత్య పోరులో తనను పావుగా వాడుకుంటున్నారన్న వార్తలను ఆయన ఖండించారు.