డ్రగ్స్ కేస్ ఎఫెక్ట్.. వెనక్కి తగ్గిన అధికారి

Posted: 07/15/2017 11:04 AM IST

తాను సెలవుల మీద వెళ్తుండటంపై తీవ్ర ఆరోపణలు రావటంతో ఎక్సైజ్ డైరెక్టర్ అకున్ సబర్వాల్ వెనక్కి తగ్గాడు. 10 రోజుల వ్యక్తిగత లీవ్ ను రద్దు చేసుకుంటున్నట్లు ప్రకటించాడు. డ్రగ్స్ కేసు తీవ్రత దృష్ట్యా ఆయన ఈ నిర్ణయానికి వచ్చినట్లు వెల్లడించాడు. దీంతో ఆయన నేతృత్వంలోనే విచారణ ముందకు సాగనుంది.

టాలీవుడ్ లో నెలకొన్న డ్రగ్స్ కల్చర్ పై ఉక్కుపాదం మోపి సెలబ్రిటీలు, బడా బాబుల గుండెళ్లో రైళ్లు పరిగెత్తించిన అకున్ వ్యక్తిగత కారణాలతో సెలవులపై వెళ్లాలని నిర్ణయించుకున్న విషయం తెలిసిందే. నేటి నుంచి 25వ తేదీ వరకు 10 రోజుల పాటు అకున్ కు లీవ్ మంజూరైంది కూడా. అదే సమయంలో ఈ నెల 19 నుంచి 27 దాకా డ్రగ్స్ కేసులో నోటీసులు అందుకున్న సెలబ్రిటీలను ఒక్కోక్కరిగా విచారించాల్సిన అవసరం ఉంది. ఈ నేపథ్యంలో అకున్ సబర్వాల్ సెలవుపై వెళితే, ఆయన స్థానంలో ఈ కేసును ఎవరు డీల్ చేస్తారంటూ విపక్షాలు ప్రభుత్వంపై విరుచుకుపడ్డాయి. దీంతో, కాస్త ఇబ్బందికి గురైన ప్రభుత్వం ఆయన సెలవును రద్దు చేసినట్టు సమాచారం.

డ్రగ్స్ విచారణ కీలక దశకు చేరుకున్న నేపథ్యంలో, సెలవులపై వెళ్లటం సబబు కాదని భావిస్తున్నట్లు ఆయన వెల్లడించాడు. విచారణ పూర్తయ్యేంత వరకు ఆయన సెలవు వాయిదా వేసుకున్నాడు. కేసు నీరుగారిపోయే అవకాశం ఉందని ప్రజలు భావించే అవకాశం ఉండటంతో ప్రభుత్వం కూడా ఆయన్ను కొనసాగాలని విజ్నప్తి చేసినట్లు తెలుస్తోంది.

కెల్విన్ లిస్ట్ లో ఎందరో...

పలువురు టాలీవుడ్ ప్రముఖులకు నోటీసులు జారీ కావడం, లిస్ట్ లో ఇంకా పొలిటికల్ లీడర్స్, బిజినెస్ మెన్ లు కూడా ఉన్నారంటూ లీకులు వస్తుండటం కలకలం రేపుతోంది. నోటీసులు అందిన వారు వ్యక్తిగతంగా విచారించనుంది సిట్. ఈ నేపథ్యంలో డ్రగ్స్ డీలర్ కెల్విన్ ను ఎక్సైజ్ సిట్ తమ కస్టడీలోకి తీసుకుంది.

చర్లపల్లి జైల్లో ఉన్న కెల్విన్ ను విచారణ నిమిత్తం సిట్ అధికారులు అదుపులోకి తీసుకున్నారు. డ్రగ్స్ కేసులో కెల్విన్ ప్రధాన నిందితుడు. రెండు రోజుల పాటు కెల్విన్ ను అధికారులు విచారించనున్నారు. కెల్విన్ ను విచారించే క్రమంలో టాలీవుడ్ లో డగ్స్ వినియోగంపై సంచలన విషయాలు వెలుగు చూసే అవకాశం ఉంది.