12 మంది టీడీపీ ఎమ్మెల్యేలు టీఆర్‌ఎస్‌లో విలీనం

Posted: 03/11/2016 07:24 AM IST

తెలంగాణలో తెలుగుదేశం పార్టీకి మరో ఊహించని షాక్ తగిలింది. ఎన్నికల్లో తెలుగుదేశం పార్టీ గుర్తు మీద గెలిచిన 15 మంది ఎమ్మెల్యేల్లో 12 మంది టీఆర్‌ఎస్‌లో విలీనమయ్యారు. మూడింట రెండొంతులకు పైగా ‘చీలిపోయామని’, తమను టీఆర్‌ఎస్‌లో కలిపేయాలన్న ఆ ఎమ్మెల్యేల విజ్ఞప్తిని శాసనసభ స్పీకర్ మధుసూదనాచారి పరిగణనలోకి తీసుకున్నారు. వారిని టీఆర్‌ఎస్‌లో విలీనం చేస్తున్నట్లు ప్రకటించారు. నిన్న రాత్రి తెలంగాణ అసెంబ్లీ కార్యాలయం బులెటిన్ విడుదల చేసింది. దీంతో ఎమ్మెల్యేలు ఎర్రబెల్లి దయాకర్‌రావు, తలసాని శ్రీనివాస్‌యాదవ్, జి.సాయన్న, టి.ప్రకాశ్‌గౌడ్, తీగల కృష్ణారెడ్డి, మంచిరెడ్డి కిషన్‌రెడ్డి, మాధవరం కృష్ణారావు, కె.పి.వివేకానంద, చల్లా ధర్మారెడ్డి, ఎస్.రాజేందర్‌రెడ్డి, మాగంటి గోపీనాథ్, అరికెపూడి గాంధీలను ఇక నుంచి టీఆర్‌ఎస్‌ఎల్పీ సభ్యులుగా పరిగణిస్తారు.

టీడీపీని వదిలిపెట్టి టీఆర్‌ఎస్‌లో చేరిన ఎమ్మెల్యేల విలీనానికి స్పీకర్‌ ఆమోదముద్ర వేసిన నేపథ్యంలో వారిపై అనర్హత వేటు పడే ప్రశ్న ఉత్పన్నం కాబోదు. టీడీపీ నుంచి టీఆర్‌ఎస్‌లో చేరి మంత్రిగా ప్రమాణ స్వీకారం చేయటానికి ముందు తలసాని శ్రీనివాస్ యాదవ్‌ ఎమ్మెల్యే పదవికి చేసిన రాజీనామా లేఖ కూడా ఇప్పుడు ఉనికి కోల్పోతుంది. అయితే, టీడీపీని వీడి టీఆర్‌ఎస్‌లో చేరిన ఎమ్మెల్యేలు తమను టీఆర్‌ఎస్‌ఎల్పీలో విలీనం చేయాలని కోరినప్పుడు, అది చట్ట సమ్మతం అవుతుందా? కాదా? అనే విషయంలో భిన్నాభిప్రాయాలు వ్యక్తమయ్యాయి. అయితే, తమను టీఆర్‌ఎ్‌సలో విలీనం చేయాలంటూ గతంలో టీడీపీ ఎమ్మెల్సీలు విజ్ఞప్తి చేసినప్పుడు అప్పట్లో వారి విజ్ఞప్తిని మండలి చైర్మన్‌ మన్నించిన చరిత్ర ఉంది. ఇప్పుడు టీడీపీ నుంచి టీఆర్‌ఎస్‌లో చేరిన ఎమ్మెల్యేలు కూడా అదే బాటలో సాగారు. తాజా విలీనంతో టీఆర్‌ఎస్‌ ఎమ్మెల్యేల సంఖ్య 78కి చేరింది.