ప్రియుడి ప్రేమలో బలైన వివాహిత మహిళ

Posted: 10/28/2015 03:15 PM IST

Housewife commit suicide for boyfriend refused her love

అప్పటికే ఆ మహిళకు వివాహమైంది.. భర్తతో కొన్నాళ్లు సజావుగానే సంసారజీవితాన్ని గడిపింది.. ఇంతలోనే ఈమెకు మరో యువకుడితో పరిచయం కాగా అతనికి ఆకర్షితురాలైంది. కొన్నాళ్లకే అతని ప్రేమలో పూర్తిగా మునిగిపోయింది. ఇంకొక విశేషం ఏమిటంటే.. ఆ యువకుడికి కూడా మరో అమ్మాయితో పెళ్లయ్యింది. ఆ విషయం తెలిసినప్పటికీ సదరు వివాహిత అతనిని ప్రేమించింది. ఈ ప్రేమ తారాస్థాయికి చేరడంతో తన భర్తను కాదనుకుని, ప్రియుడితోనే జీవతం కొనసాగించాలని నిర్ణయించుకుంది. కానీ.. ఆ ప్రియుడు తన భార్యతోనే జీవితం కొనసాగిస్తానని, తన ప్రేమను అంగీకరించనని తేల్చి చెప్పడంతో ఆ వివాహిత ఆత్మహత్యకు పాల్పడింది. ఈ ఘటన అనంతపురం జిల్లాలో చోటు చేసుకుంది.

గుమ్మగట్ట మండలం నేత్రపల్లి గ్రామానికి చెందిన జయలక్ష్మి అనే మహిళకు కొన్నాళ్ల క్రితం ఓ వ్యక్తితో వివాహం అయింది. అతనితో సంతోషంగానే సంసార జీవితాన్ని గడుపుతూ వస్తోంది. ఈ క్రమంలోనే ఈమెకు అదే గ్రామానికి చెందిన రుద్ర అనే యువకుడితో పరిచయం అయింది. ఆ యువకుడికి ఇటీవల పెళ్లయ్యింది కూడా. ఈ విషయం జయలక్ష్మీకి తెలిసినప్పటికీ అతనితో వివాహేతర సంబంధం కొనసాగించింది. అతని ప్రేమలో పూర్తిగా మునిగిపోయిన ఈమె.. తన బర్తను కాదనుకుని రుద్రతోనే వుండేందుకు నిర్ణయించుకుంది. ఈ విషయం జయలక్ష్మీ భర్తకు తెలియగా.. ఆ దంపతుల మధ్య గొడవ జరిగింది. మొత్తం వ్యవహారం బట్టబయలు కాగా.. అటు రుద్ర కుటుంబంలోనూ తగాదాలు ఏర్పడ్డాయి. చివరికి ఈ పంచాయతీ పంచాయతీ పోలీసుల వరకూ వెళ్లింది. ఈ మొత్తం తతంగం విని ఖంగుతిన్న పోలీసు అధికారులు.. ఎవరి కాపురం వారు చక్కగా చేసుకోవాలని సర్దిచెప్పి పంపించారు.

తాను ప్రియుడితోనే వుంటానంటూ జయలక్ష్మీ వాదించగా.. ప్రియుడు రుద్ర మాత్రం తన భార్యతోనే ఉంటానని తెగేసి చెప్పాడు. దీంతో కథ అడ్డం తిరిగింది. భర్తను వదిలేసి ప్రియుడితో జీవితాన్ని సంతోషంగా గడుపుదామని భావించిన జయలక్ష్మీకి రుద్ర నిర్ణయం మింగుడు పడలేదు. దీంతో తీవ్ర మనస్తాపానికి గురైన ఆమె.. మంగళవారం రాత్రి రుద్ర ఇంటి వద్దకు వెళ్లి పురుగుల ముందు తాగి ఆత్మహత్య చేసుకుంది. ఈ ఘటన ఆ గ్రామంలో తీవ్ర కలకలం రేపింది.