గోద్రా ఘటనతోనే మోడీ ప్రపంచానికి తెలుసు.. కానీ..!

Posted: 10/14/2015 08:20 PM IST

మహారాష్ట్ర బిజెపితో పాటు శివసేన పార్టీ కేంద్రానికి కూడా పంటికింద రాయిలా మారింది. దాద్రీ ఘటనను ఖండించడంతో పాటు ముంబైలో గులాం అలీ కచేరీని రద్దు చేయడాన్ని దురదృష్టకరమైందన్న ప్రధాని నరేంద్ర మోదీపై శివసేన విరుచుకుపడుతోంది. ఆనంద్ బజార్ పత్రికకు ఇచ్చిన ఇంటర్వూలో ప్రధాని మాట్లాడుతూ ఈ రెండు అంశాలు రాష్ట్రప్రభుత్వాల పరిధిలోనివని, కేంద్రానికి వీటితో సంబంధమేంటని ప్రధాని ప్రశ్నించారు. ప్రధాని వ్యాఖ్యలపై చిర్రుబుర్రులాడిన శివసేన ఆయన్ను, బిజెపిని ఇరుకున పెట్టేందుకు యత్నించింది.

అహ్మదాబాద్ లో జరిగిన గోధ్రా అల్లర్లతోటే మోదీ పాపులర్ అయ్యారని, గోధ్రా కారణంగా ఆయన ప్రపంచానికి తెలిసిన వ్యక్తిగా మారారన్నారు. ఆ ఘటనలతోనే తమకు మోడీ అంటే గౌరవభావమని శివసేన ఎంపీ సంజయ్ రౌత్ ప్రకటించారు. ముంబైలో సుధీంద్ర కులకర్ణికి నల్లరంగు పూయడంపై మహారాష్ట్ర సిఎం బహిరంగంగానే శివసేనను విమర్శించారు. దీనిపై కూడా శివసేన అగ్గిమీదగుగ్గిలం అవుతోంది. తాజా పరిస్థితులను బట్టి చూస్తే త్వరలోనే కేంద్రంతో పాటు మహారాష్ట్ర ప్రభుత్వం నుంచి కూడా శివసేన వైదొలగవచ్చని భావిస్తున్నారు.

జి. మనోహర్