యాసిడ్ దాడి చేస్తామంటూ నటి మాలాశ్రీకి బెదిరింపులు..

Posted: 02/28/2015 12:47 PM IST

కన్నడ చిత్రపరిశ్రమలో నటిగా మంచి గుర్తింపు సాధించిన మాలాశ్రీపై యాసిడ్ దాడి చేస్తామంటూ కొందరు దుండగులు బెదిరిస్తున్నారని ఆమె వెల్లడించింది. తన వ్యాపారాలావాదేవీల్లో వచ్చే డబ్బులో తనకు వాటా ఇవ్వాలంటూ ఒక ఉద్యోగి తన వెంటపడుతున్నాడని, లేకపోతే యాసిడ్ దాడి చేస్తానంటూ ఫోన్ చేసి బెదిరిస్తున్నాడని ఆమె పోలీసులకు ఫిర్యాదు చేసింది. ఆ ఉద్యోగితోపాటు మరో ఇద్దరు జతకలిసి తనపై యాసిడ్ దాడి చేసేందుకు కుట్రపన్నుతున్నారని ఆమె ఫిర్యాదులో పేర్కొంది. దీంతో కేసు నమోదు చేసిన పోలీసులు.. నిందితుల కోసం గాలిస్తున్నారు.

వివరాల్లోకి వెళ్తే.. ప్రస్తుతం తన భర్త రాముతో కలిసి బెంగుళూరులో వుంటున్న నటి మాలాశ్రీ పేరిట చెన్నైలో ఒక మాల్, అపార్ట్ మెంట్ లు వున్నాయి. వాటి నిర్వహణ, పర్యవేక్షణ కోసం ఆమె ఓ ఉద్యోగిని నియమించుకుంది. గతకొన్నాళ్ల నుంచి అతడు ఎంతో నమ్మకంగా వుంటూ సక్రమంగా విధులు నిర్వహించుకునేవాడు. అయితే..  ఇటీవలే మాలాశ్రీ అపార్ట్ మెంట్ విక్రయించేందుకు సిద్ధంకాగా... వచ్చే డబ్బులో తనకు వాటా ఇవ్వాలని ఆ ఉద్యోగి పట్టుబడ్డాడట! లేదంటే యాసిడ్ దాడి చేస్తానంటూ ఫోన్ లో బెదిరిస్తున్నాడట! దీంతో భయపడిపోయిన ఆమె.. వెంటనే పోలీసులకు ఫిర్యాదు చేసింది. అతనితో మరో ఇద్దరు కూడా వున్నారని, వాళ్లంతా కలిసి తనపై కుట్ర పన్నుతున్నారని ఆమె తన ఫిర్యాదులో వెల్లడించింది. దీంతో కేసు నమోదు చేసిన పోలీసులు.. పరారీలో వున్న నిందితుల కోసం గాలిస్తున్నారు.

AS