విద్యావతులైన పడతులకు పతుల్ దోరుకుట కష్టమా..?

Posted: 02/05/2015 06:43 PM IST

యూనివర్సిటీ, కాలేజీ స్థాయి చదువు పూర్తిచేసిన భారతీయ యువతులకు సంబంధించి ఓ ఆసక్తికర విషయం కనుగొన్నారు. లండన్లోని ఆక్స్ఫర్డ్ యూనివర్సిటీకి చెందిన పరిశోధకులు ఇటీవల చేసిన సర్వేలో ఓ సరికొత్త విషయాన్ని వెల్లడించారు. రాబోయే కాలంలో ఉన్నత చదువులు చదివిన యువతులకు వివాహమయ్యేది కష్టమేనంటున్నారు. ప్రస్తుతం దేశంలో అనుసరిస్తున్న వివాహ విధానమే కొనసాగితే 2050 సంవత్సరంనాటికి విద్యాధికులైన మహిళలకు తగిన వరుడు లభించక పెండ్లి కావడం కష్టమవుతుందని ఓ అధ్యయనంలో తేలింది. ఆక్స్‌ఫర్డ్ యూనివర్సిటీ, బార్సిలోనాకు చెందిన సెంటర్ ఫర్ డెమోగ్రాఫిక్ స్టడీస్, అమెరికాలోని మిన్నెసోటా పాపులేషన్ సెంటర్ సంయుక్తంగా ఈ అధ్యయనం జరిపాయి.

భారత్‌లో ప్రస్తుతం మహిళలకు తమకన్నా ఎక్కువ చదువుకున్న, ఎక్కువ వయసున్న మగవారితోనే వివాహం జరుగుతున్నది. అయితే ఇటీవలికాలంలో మహిళలు విద్యలో మరింత గొప్పగా రాణిస్తూ ఉన్నతవిద్యలో పురుషుల కన్నా ముందుంటున్నారు. ఈ నేపథ్యంలో ఎప్పటిలాగే తమకన్నా ఎక్కువ విద్యార్హత కలిగిన వరుడినే వారు కోరుకుంటారని, దాంతో వారికి తగిన జీవితభాగస్వామి లభించడం కష్టమవుతుందనేది ఈ అధ్యయనం స్పష్టం చేస్తోంది.

జి.మనోహర్