ఆయన్ను హీరో చేస్తే చూస్తూ ఊరుకోము

Posted: 12/30/2014 08:28 AM IST

జాతిపిత మహాత్మాగాంధీని హత్య చేసిన నాథురాం గాడ్సేకు గుడి కట్టే ప్రయత్నాలపై కోర్టు తీవ్రంగా స్పందించింది. గాడ్సేకు గుడి కడితే చూస్తూ ఊరుకోమని ఉత్తరప్రదేశ్ లోని సీతాపూర్ జిల్లా కోర్టు హెచ్చరించింది. కేవలం సీతాపూర్ కోర్టు పరిధిలోనే కాదు.., దేశంలో ఎక్కడ గాడ్సేకు గుడి కట్టినా సహించము అని న్యాయమూర్తి పాండే హెచ్చరించారు. ఎవరైనా గుడి కట్టేందుకు ప్రయత్నిస్తే.., జాతీయ భద్రతా చట్టం (ఎన్.ఎస్.ఏ) ప్రకారం కఠిన చర్యలు తీసుకుంటామన్నారు. జాతిపితను చంపిన వ్యక్తికి గుడి కట్టడం ఏమిటని న్యాయమూర్తి ఆశ్చర్యం వ్యక్తం చేశారు. ఇలాంటి ప్రయత్నాల వల్ల దేశంలో తీవ్రవాదం, హింస పురివిప్పే అవకాశం ఉందన్నారు.

2015 జనవరి 30న సీతాపూర్ జిల్లాలోని పారా గ్రామంలో గాడ్సేకు గుడి కడతానని కమలేష్ అనే వ్యక్తి గతంలో ప్రకటించాడు. ఇందుకోసం తనకున్న భూమిలో కొంత దానం చేశానని కూడా చెప్పాడు. ఈ నిర్ణయాన్ని కొందరు సమర్ధించగా.. ఇంకొందరు వ్యతిరేకించారు. ఈ నేపథ్యంలోనే స్పందించిన కోర్టు కమలేష్ కు వ్యతిరేకంగా తీర్పు ఇచ్చింది. ఇదే సమయంలో ఈ మద్య గాడ్సేను కొన్ని సంఘాలు హీరోను చేస్తున్నాయంటూ మండిపడింది. కోర్టు తీర్పు నేపథ్యంలో కమలేష్ వెనక్కి తగ్గుతాడా.., తన సంకల్పాన్ని కొనసాగిస్తాడా తెలియాల్సి ఉంది.

 

 

కార్తిక్