తెలంగాణాలో ప్రచారానికి ఆఖరి రోజు కార్యక్రమాలు

Posted: 04/28/2014 10:00 AM IST

ఎన్నికల నియమావళిని అనుసరించి ఎన్నికలకు 48 గంటల ముందుగానే ప్రచారాన్ని నిలిపివేసి వోటర్లకు ఆలోచించుకునే సమయాన్నివ్వాలి కాబట్టి, తెలంగాణా నియోజకవర్గాల్లో ఈ నెల 30 న ఎన్నికలు జరుగుతుండటంతో ఈరోజు సాయంత్రం నాలుగు గంటలకు నాయకులు ప్రచారానికి ముగింపు పలకవలసివుంటుంది.   

17 లోక్ సభ స్థానాలకు 265 మంది, 119 శాసన సభ స్థానాలకు 1669 ఎన్నికల బరిలో ఉండగా పటిష్టమైన భద్రతా ఏర్పాట్లు, పోలింగ్ స్టేషన్లలో తగు ఏర్పాట్లతో ఎన్నికల కమిషన్ సిద్ధంగా ఉన్నట్లుగా తెలుస్తోంది.  ఎన్నికలకు 48 గంటల లోపు వోటర్లను ప్రభావితం చేసే కార్యకలాపాలేమీ ఉండగూడదని, ప్రచారంలో ఉన్న నాయకులలో ఎన్నికలు జరిగే చోట్లలో వోటు హక్కు లేనివారు ఈ రోజు సాయంత్రం వరకు ఎన్నికలు జరుగనున్న ప్రాంతాలను వదిలి వెళ్ళిపోవాలని రాష్ట్ర ఎన్నికల అధికారి భన్వర్ లాల్ తెలియజేసారు.  

ఈరోజు సాయంత్రం నుంచి మద్యం దుకాణాలు కూడా మూసి వెయ్య బడతాయి.  ఎన్నికల రోజున సినిమా ధియేటర్లను కూడా ఆంధ్ర ప్రదేశ్ సినిమా అసోసియేషన్ల పిలుపుతో మూసివేస్తున్నారు.  

భన్వర్ లాల్ చేసిన ప్రకటన ప్రకారం, ఇప్పటి వరకు 125.31 కోట్ల నగదు, 74.2 కిలోల బంగారం, 708 కిలోల వెండి వస్తువులు, 4.57 లక్షల లీటర్ల మద్యం స్వాధీనం చేసుకోవటం జరిగింది. ఎన్నికల సమయంలో డబ్బు పంపిణీ జరగకుండా ముమ్మరంగా తనిఖీలను నిర్వహించటం చేస్తున్నారు.

Related articles

-శ్రీజ