Posted: 12/31/2012 08:47 AM IST

మహిళలపై పెరిగిపోతున్న లైంగిక దాడులను అరికట్టేందుకు కఠిన చట్టాల రూపకల్పన దిశగా కాంగ్రెస్ ముసాయిదా బిల్లును తయారు చేస్తోంది. అత్యాచారాల కేసుల్లో నిందితులకు 30 ఏళ్ల వరకు జైలుశిక్ష, అరుదైన కేసుల్లో భవిష్యత్తులో వారు సెక్సుకు పనికిరాకుండా రసాయనాలతో నపుంసకులుగా (కెమికల్ కాస్ట్రేషన్) మార్చడం లాంటి పలు కఠిన చర్యలను అందులో ప్రతిపాదిస్తోంది. ఢిల్లీలో 23 ఏళ్ల యువతి అత్యంత క్రూరంగా అత్యాచారానికి గురైన ఘటన నేపథ్యంలో కేంద్ర ప్రభుత్వం జస్టిస్ జె.ఎస్.వర్మ నేతృత్వంలో ఏర్పాటు చేసిన కమిటీకి ఈ ముసాయిదా బిల్లును సమర్పించనున్నారు. బడ్జెట్ సమావేశాల్లో ఈ బిల్లును ప్రవేశ పెట్టనున్నారు. అత్యాచారాల బాధితులకు సత్వర న్యాయం చేకూర్చడం, నిందితులకు గరిష్ట శిక్ష విధించడం లాంటి చర్యలకు వీలుగా చట్టాలను సవరించేందుకు తగిన సిఫారసుల కోసం సుప్రీంకోర్టు మాజీ ప్రధాన న్యాయమూర్తి వర్మ నేతృత్వంలో త్రిసభ్య కమిటీ ఏర్పాటైన సంగతి తెలిసిందే. ఈ నేపథ్యంలోనే కాంగ్రెస్ ముసాయిదా బిల్లు సిద్ధం చేస్తోంది. అత్యాచార దోషులకు మూడు నెలల్లో శిక్షలు పడేలా ఫాస్ట్‌ట్రాక్ కోర్టులను ఏర్పాటు చేయాలని, బాల నేరస్తుల చట్టాన్ని సవరించాలని, బాల నేరస్తుల వయసు పరిమితిని మరింత తగ్గించాలని సూచించింది. కొన్ని దేశాలలో రేప్ చేసినవారిని రసాయన పద్దతులలో నపుంసకులుగా మార్చే శిక్షలు ఉన్నాయని చెబుతున్నారు. మరి ఈ శిక్షల ద్వారా మన దేశంలో లైంగిక దాడులు తగ్గిపోవచ్చు. కానీ వాటిని అక్రమంగా అమలుచేస్తేనే.