Posted: 11/03/2012 11:52 AM IST

అవినీతిని నిలువరించే పేరుతో దేశంలోని ప్రజాస్వామ్య సంస్థల పరువు ప్రతిష్టలను దెబ్బతీసే విధంగా నీచమైన విషప్రచారాలకు పాల్పడవద్దని రాష్టప్రతి ప్రణబ్ ముఖర్జీ హెచ్చరించారు. దేశంలో అవినీతి పెచ్చరిల్లడంపై తీవ్రస్థాయిలో ఆరోపణలు వెల్లువెత్తుతున్న నేపథ్యంలో ఆయన ఈ హెచ్చరిక చేశారు. అఖిల భారత లోకాయుక్తల సదస్సును ఆయన న్యూఢిల్లీలో ప్రారంభించారు. ఈ సందర్భంగా ప్రణబ్ ప్రసంగిస్తూ, దేశాన్ని పట్టిపీడిస్తున్న అవినీతి సమస్యపై ప్రజలు ఆగ్రహాన్ని వ్యక్తం చేయడం న్యాయబద్ధమేనని, అయితే అవినీతిపై పోరు పేరుతో ప్రజాస్వామ్య సంస్థలపై దాడి చేసేవారిని ఎంతమాత్రం ఉపేక్షించరాదని అన్నారు. ‘అవినీతిపై పోరు పేరుతో ప్రజాస్వామ్య సంస్థల పరువు ప్రతిష్టలకు భంగం కలిగే విధంగా దుష్ప్రచారాలకు పాల్పడరాదు. తప్పుడు ఆరోపణల వలన దేశ ఖాతి దిగజారుతుంది’ అని ఆయన అన్నారు.