Posted: 10/05/2012 06:43 PM IST

నెలకు 50 వేల రూపాయలకు పైగా వేతనం..ఇంటి అవసరాల నుంచి పిల్లల చదువు, బీమా, లోన్లు దాకా ప్రతి అవసరం దానిలోంచే తీరాలి.. అలాంటి ఎగువ మధ్యతరగతి కుటుంబానికి ఏడు నెలలుగా వేతనం అందకపోతే, ఇంటి పెద్ద దాదాపు రోడ్డున పడిపోతే ఏమిటీ పరిస్థితి? ప్రైవేట్ విమానయాన సంస్థ 'కింగ్ ఫిషర్' సంక్షోభంలో పడిపోవడంతో సంస్థ ఉద్యోగులు అనుభవిస్తున్న క్షోభ ఇది. ఈ నేపథ్యంలో సంస్థలో ఇంజనీర్‌గా పనిచేస్తున్న ఓ ఉద్యోగి భార్య ఆత్మహత్య చేసుకున్నారు. 'ఆర్థిక సమస్యలే ఆత్మహత్యకు కారణం. సంస్థ తీసుకుంటున్న కఠిన వైఖరి కలిగిస్తున్న ఆర్థిక ఒత్తిడిని తట్టుకోలేకపోయా''నని సూసైడ్ లేఖలో ఆ గృహిణి పేర్కొన్నారు. దాదాపు దివాలా తీసిన కింగ్‌ఫిషర్ కనీసం తన ఉద్యోగులకు వేతనాలు ఇవ్వలేని దుస్థితిలో పడింది. దీనిపై ప్రభుత్వం ఇప్పటికే స్పందించింది. సిబ్బందికి వేతన బకాయిలను పూర్తిగా చెల్లించాల్సిందేనని డైరెక్టరేట్ జనరల్ ఆఫ్ సివిల్ ఏవియేషన్ (డీజీసీఏ)..కింగ్‌ఫిషర్‌కు ఆదేశాలు జారీచేసింది. దీనిపై సమగ్ర ప్రణాళికను అందించాలని కూడా కోరింది. మరోవైపు, డీజీసీఏ అనుమతి లేకుండా విమానాలు తిప్పడానికి లేదని ప్రభుత్వం తేల్చిచెప్పింది.