Posted: 07/28/2012 02:09 PM IST

        రంగురంగుల విద్యుద్దీపాలతో, నింగినంటిన బాణసంచా మెరుపులతో లండన్ నగరం మెరిసిపోయింది. ప్రతిష్ఠాత్మక లండన్ ఒలింపిక్స్ రాత్రి అంగరంగ వైభవంగా ప్రారంభమయ్యాయి. 19 రోజులపాటు జరిగే ఈ పోటీలు ప్రపంచ క్రీడాభిమానులకు కనువిందుచేయనున్నాయి. తొలిరోజునే ఒలింపిక్స్‌లో సంచలనాలకు తెరలే చింది. అర్చరీ విభాగంలో దక్షిణ కొరియా అంధ విలుకాడు ఇమ్ డాంగ్ హ్యూన్  రెండు ప్రపంచ రికార్డులు బద్దలు కొట్టి సంచలనం సృష్టించాడు. ఖమ్మం జిల్లాకు చెందిన సింగం సాయి విశాల్  లండన్ ఒలింపిక్స్ టార్చి రిలేలో పాల్గొని అరుదైన ఘనత సొంతం చేసుకున్నాడు. కాగా, ఒలింపిక్స్ పోటీలు మొదలై మూడ్రోజులైనా పతకాల పంట పండేది మాత్రం నేటినుంచే. అలాగే భారత్ అసలు సిసలు సమరం కూడా.

      శుక్రవారం కేవలం ఆర్చరీ ర్యాంకింగ్ రౌండ్లో పాల్గొన్న భారత్.. శనివారం పలు క్రీడాంశాల్లో పోటీపడుతోంది. స్టార్ బాక్సర్ విజేందర్ సింగ్, శివథాపా, తెలుగుతేజాలు కశ్యప్, జ్వాల, సానియా, మహిళా వెయిట్‌లిఫ్టర్ సోనియా చాను, షూటర్ విజయ్‌కుమార్ తదితరులు బరిలోకి దిగుతున్నారు.  ఇవాళ (శనివారం) ఫలితం తేలే మూడు క్రీడాంశాల్లో భారత్ అదృష్టాన్ని పరీక్షించుకుంటోంది. వీటిలో పురుషుల ఆర్చరీ టీమ్, పురుషుల 10 మీ. ఎయిర్ పిస్టల్, మహిళల 48 కిలోల వెయిట్‌లిఫ్టింగ్ విభాగాలున్నాయి. అయితే, ఈ మూడింటిలోనూ భారత్‌కు పతకం వచ్చే అవకాశాలు తక్కువే. ఏదైనా అద్భుతం జరిగితేనే సాధ్యం.       నేటి పోటీల్లో విశేషం ఏమిటంటే తెలుగుతేజాలు తమ సత్తా చాటబోతున్నారు. ఇవాల్టి పోటీల్లో ముగ్గురు రాష్ట్ర క్రీడాకారులు పాల్గొంటున్నారు. బ్యాడ్మింటన్ పురుషుల సింగిల్స్‌లో కశ్యప్, మహిళల డబుల్స్, మిక్స్‌డ్ డబుల్స్‌ లో జ్వాల, టెన్నిస్ మహిళల డబుల్స్‌లో సానియా సమరానికి సన్నద్ధమయ్యారు. రష్మీ చక్రవర్తితో కలసి బరిలోకి దిగుతున్న సానియా తొలిరౌండ్లో చైనీస్‌తైపీ జోడీ చ్వాంగ్, సీహ్‌తో తలపడనుంది. ఇక కశ్యప్ గ్రూప్ దశలో టాన్ యుహాన్ (బెల్జియం)తో, మహిళల డబుల్స్‌లో అశ్వినీతో కలసి జ్వాల.. ఫుజి/కకీవా (జపాన్)తో, మిక్స్‌డ్‌లో దిజుతో జతకట్టి నట్సిర్/అహ్మద్ (ఇండోనేసియా)తో పోటీపడుతున్నారు.

...avnk