Posted: 06/10/2012 07:03 PM IST

      తొలి మానవసహిత అంతరిక్ష డాకింగ్ ను ఈనెలలోనే చేపట్టనున్నట్లు  చైనా ప్రకటించింది. అంతరిక్ష డాకింగ్ కోసం షెంజౌ-9 వ్యోమనౌకను లాంగ్ మార్చ్-2ఎఫ్ రాకెట్ ద్వారా ప్రయోగించనుంది. తర్వాత కక్ష్యలో ఉన్న తియాంగాంగ్-1 వ్యోమనౌకతో షెంజౌ-9ను అనుసంధానం చేస్తారు. శాశ్వత అంతరిక్ష కేంద్రం నిర్వహణకు ఈ ప్రక్రియలో నైపుణ్యం సాధించడం చాలా అవసరమని ప్రయోగం కోసం ఏర్పాట్లు జరుగుతున్నట్లు అధికారులు వెల్లడించారు. షెంజౌ-9ను జిక్వాన్ ఉపగ్రహ ప్రయోగ కేంద్రానికి తరలించినట్లు శాస్త్రవేత్తలు తెలిపారు. ఇందులో ప్రయాణించేందుకు ఏడుగురు వ్యోమగాములు ఇప్పటికే శిక్షణను పూర్తి చేసుకున్నట్లు పేర్కొన్నారు. వీరిలో ముగ్గుర్ని ఎంపిక చేయగా ఇందులో ఓ మహిళకు చోటు దక్కే అవకాశముందని శాస్త్రవేత్తలు భావిస్తున్నారు. చైనా తొలి మానవసహిత అంతరిక్ష యాత్రను 2003లో చేపట్టింది. ఆతర్వాత అనేక యాత్రలు నిర్వహించింది. గతేడాది మానవరహిత అంతరిక్ష డాకింగ్ ను విజయవంతంగా చేపట్టింది.

...avnk