Posted: 05/23/2012 07:26 PM IST

సెప్టెంబర్ 6న 'గాలి'ని సీబీఐ అదుపులోకి తీసుకుంది. ఇటీవలి వరకూ హైదరాబాద్‌లోని చంచల్‌గూడ జైల్లో గడిపిన ఆయన ప్రస్తుతం ఏఎంసీ కేసులో బెంగళూరు పరప్పన అగ్రహార జైల్లో ఉన్నారు. ఓఎంసీ కేసులో బెయిల్ లభించినప్పటికీ ఏఎంసీలో అక్రమాలకు సంబంధించి బెయిల్ రాకపోవడంతో గాలికి జైలు జీవితం తప్పడం లేదు. కాగా, సెప్టెంబర్ 6 నుంచి జైల్లోనే ఉన్న 'గాలి' కర్ణాటక విధాన పరిషత్ కార్యకలాపాలకు హాజరు కాలేకపోయారు. నిబంధనల ప్రకారం వరుసగా మూడు సమావేశాలకు గైర్హాజరైతే సభ్యత్వం రద్దు కావాల్సి ఉంది. అయితే త్వరలోనే సభ్యత్వం రద్దుకానుండటంతో ఆయనపై ఎలాంటి చర్య తీసుకోలేదు.  గనుల అక్రమ తవ్వకాల కేసుల్లో జైలు ఊచలు లెక్కిస్తున్న బీజేపీ ఎమ్మెల్సీ గాలి జనార్దన్‌రెడ్డి పదవీకాలం జూన్ 17తో ముగియనుంది. ఆలోపు 'గాలి'కి బెయిల్ లభించే అవకాశాలు తక్కువేనని సీబీఐ వర్గాలంటున్నాయి. దీంతో ఆయన జైల్లోనే పదవీకాలం ముగిసిన తొలి ఎమ్మెల్సీ కానున్నారు. బళ్లారి జిల్లాను బీజేపీ కంచుకోటగా మార్చి రాజ్యమేలిన గాలి జనార్దన్ రెడ్డి గత ఏడాది జూలై 30న యడ్యూరప్ప సీఎం పదవికి రాజీనామా చేయడంతో మంత్రి పదవి కోల్పోయారు. అనంతరం గనుల కుంభకోణాలపై ఆంధ్రప్రదేశ్‌లో సీబీఐ దర్యాప్తు ప్రారంభమయింది.