Posted: 02/02/2012 11:28 AM IST

2జి కేసులో కీలకమైన సుప్రీం కోర్టు నిర్ణయం ఈ రోజు హోం మంత్రి చిదంబరానికి ఊరటనిచ్చింది. నిందితుడిగా తిహార్ జైల్లో రిమాండ్ లో ఉన్న ఎ.రాజా తో పాటు చిదంబంరం కూడా దోషే నంటూ ఆర్థిక మంత్రిత్వ శాఖ నుండి చిదంబరం లేఖను అందుకు ఆధారంగా చూపిస్తూ పిటిషన్ వేసిన జనతా పార్టీ అధ్యక్షుడు సుబ్రమణ్య స్వామి కాకుండా దీనిమీద కేంద్రంలో ప్రధాన విపక్షమైన భాజపా కూడా ఇంత వరకూ ఎన్నో వ్యాఖ్యానాలు చేసింది. కానీ సుప్రీం కోర్టు చిదంబరం మీద సిబిఐ విచారణకు నిరాకరించింది. కింది కోర్టులోనే నిర్ణయం జరుగుతుందని తేల్చివేసింది.

కేంద్ర ప్రభుత్వం చిదంబరం విషయంలో ఆయన మీద సంపూర్ణ విశ్వాసాన్ని ప్రకటించింది. తప్పంతా రాజాదే నని స్పష్టం చేసింది. టెలికాం మంత్రిగా వ్యవహరించిన ఎ రాజా 2008 లో జనవరి 9 నుంచి 15 వరకూ 2జి విషయంలో జరగవలసిన సమావేశాన్ని ఎప్పటికప్పుడు వాయిదా వేస్తూ, ఈ మధ్యలో జనవరి 10 న లెటర్ ఆఫే ఇంటెంట్ ని జారీ చేసిన నేపథ్యంలో ఆ సమయంలో ఆర్థిక మంత్రిగా వ్యవహరించిన చిదంబరం పాత్ర అందులో ఎలా ఉంటుందని కేంద్ర ప్రభుత్వం ప్రశ్నించింది.

2008 తర్వాత 122 సంస్థలకు 2జి లైసెన్స్ లను ఇవ్వటం జరిగింది. ఎ రాజా టెలికాం మంత్రిగా ఉన్నప్పుడు అనుమతించిన ఆ సంస్థల లైసెన్స్ లను సుప్రీం కోర్టు రద్దు చేసింది. . అయితే హోం మంత్రి చిదంబరానికి ఇది కేవలం తాత్కాలికమైన రిలీఫ్ మాత్రమే. కింది కోర్టులో ఇంకా కేసు అలాగే ఉంది.

-శ్రీజ