Posted: 01/29/2012 01:42 PM IST

రాజీవ్ యువకిరణాల పేరుతో లక్షమంది ఉద్యోగాలను ఫిబ్రవరి నాలుగున ప్రధానమంత్రి చేతుల మీదుగా ఇప్పించాలని గచ్చిబౌలి స్టేడియంలో ఆర్భాటంగా ఏర్పాట్లు చేస్తుంటే ప్రధాని రారంటూ పిఎమ్ ఆఫీసునుంచి సందేశం వచ్చింది. ఇప్పటికి ఎన్నో సార్లుగా ఈ కార్యక్రమాన్ని ప్రధాన మంత్రి కోసం వాయిదా వేస్తూ వచ్చారు. కానీ సమయం సర్దుబాటు కాలేదు. ఈ సారి తప్పకుండా వస్తానని మాటిచ్చిన ప్రధాన మంత్రి మరోసారి రాలేనని చెప్పేసారు.

టైం లేదనే మాటకి అర్థం లేదు నిజం చెప్పాలంటే. మనం చెయ్యదలచుకున్న పనులకు, మనకు అవసరం అని అనిపించిన పనులకు టైం లేకపోవటమనేది ఉండదు. ఎవరైనా ఇంటి ఆహ్వానిస్తే, వారితో మనకేమైనా అవసరమున్నా లేదా వారితో చెలిమిని నిలుపుకోవలనుకున్నా మనం తప్పకుండా వెళ్తాం. అలాంటిదేమీ లేదనుకుంటే, వెళ్ళిరావటం అనవసరమైన శ్రమ అనుకుంటే వెళ్ళం. అంటే మనమిచ్చే ప్రాధాన్యతనిబట్టే టైం ఉండటం, ఉండకపోవటం సంభవిస్తుంది. మన రాష్ట్రానికి రావటం ప్రధానమంత్రి కి ప్రధానం కాదు. ఆ సమయంలో వేరే ఎవరో విదేశీ అతిధులు వస్తున్నారట. నిజమే అయ్యుండవచ్చు కానీ వారు కూడా ప్రధానమంత్రిని టైం అడక్కుండా వారి ప్రోగ్రాం పెట్టుకోరు కదా. వారికి ఈ సమయాన్ని కేటాయించారూ అంటే అంతకు ముందు ఈ కార్యక్రమానికి కేటాయించలేదన్నమాట.

ఏది ఏమైనా ప్రధాన మంత్రిని రాష్ట్రానికి రప్పించిన ఘనత ముఖ్యమంత్రికి దక్కటం లేదు. రాజకీయ వర్గాల్లో తన పలుకుబడిని చూపించటానికి ఇలాంటివి పనికివస్తాయి కానీ కిరణ్ కుమార్ రెడ్డి ఆ అవకాశాన్ని పోగొట్టుకున్నారు.  అందులోనూ ఆయన ప్రతిష్టాత్మకంగా తీసుకున్న యువకిరణాలాయె.

-శ్రీజ