Posted: 01/18/2012 11:38 AM IST

సినిమాల్లోనే కాదు నిజంగా ఇంకా ఇలా జరుగుతోందా అని నగరవాసులను ఆశ్చర్యపరచే విధంగా విషయాలు కోర్టు వరకూ వెళ్ళకుండా స్థానికంగానే పరిష్కరించుకోవటం కోసం పల్లెల్లో ఇంకా గ్రామ పెద్దలు విచారణ చేసి తీర్పునిచ్చే ఆనవాయితీ కొనసాగుతూనేవుంది.

కృష్ణా జిల్లా, ఉంగుటూరు మండలం, పుట్టపాడులో జరిగిన ఉదంతమిది. పుట్టపాడు గ్రామవాసి నాగభూషణాన్ని పంచాయితీకి పిలిచి 1000 రూపాయల జుర్మానా చెల్లించి బాధితుడి కాళ్ళు పట్టుకుని క్షమాపణ కోరవలసిందిగా కులపెద్దలందరూ ఇచ్చిన తీర్మానాన్ని ప్రతిఘటించటమే కాకుండా పోలీసులకు ఫిర్యాదు చేస్తాననటంతో ఆగ్రహించిన పెద్దలు పెద్దరికాన్ని ప్రదర్శిస్తూ అతని మీద దాడి చేసారు. దానితో భయం, అవమానం, ఆవేశం కలిసి నాగభూషణాన్ని ఉద్రిక్తతకు లోనుచేసి రక్తపోటుని పెంచాయి. ఆ తర్వాత అతనికి గుండెపోటు కూడా వచ్చింది. హాస్పిటల్ కి తరలించినా నాగభూషణం ప్రాణాలను కాపాడలేకపోయారు.

ఈ పంచాయితీ కి కారణం, నాగభూషణం కుమారుడి కారు టైర్లకు రోజూ పనిగట్టుకుని పంచర్లు చేస్తూ నష్టం కలిగిస్తున్నాడో యువకుడు. జరుగుతున్నదాన్ని కనిపెట్టిన నాగభూషణం అనిలే అనే ఆ యువకుడిని పట్టుకుని కొట్టగా అతను కులపెద్దలకు ఫిర్యాదు చేసాడు. అతన్ని కొట్టిన పంచాయితీ లో నాగభూషణానికి వెయ్యి రూపాయల జుర్మానా, అనిల్ కాళ్ళు పట్టుకుని క్షమాపణ కోరటాన్ని తీర్పుగా నిర్ణయించిన పెద్దల మాటను ధిక్కరించిన నేరం మీద నాగభూషణం మీద వారంతా దాడిచేసారు.

-శ్రీజ