Posted: 01/17/2012 01:35 PM IST

విశ్వవ్యాప్తంగా ఎంతో సమాచారాన్ని ఇంటర్నెట్ వినియోగదారులకు అందించే వికిపిడియా రేపు 24 గంటల పాటు సమ్మె చేస్తోంది. వికిపీడియా తెరిచినట్లయితే, రేపంతా వికిపీడియా మామూలుగా ఇచ్చే సమాచారం స్థానంలో ఆన్ లైన్ పైరసీ యాక్ట్, ప్రొటెక్ట్ ఇంటలెక్చువల్ ప్రాపర్టీ యాక్ట్ ల వివరాలు మాత్రమే లభ్యమౌతాయి.

అమెరికా లో ప్రతిపాదించిన పైరసీ వ్యతిరేక చట్టం వలన ఇంటర్ నెట్ భవిష్యత్తు ప్రమాదంలో పడబోతున్నదని భావిస్తూ, ఈ విషయాన్ని విశ్వవ్యాప్తంగా తెలియజేస్తూ, ఇంటర్ నెట్ వినియోగదారులలో చైతన్యం తేవటం కోసం 24 గంటలపాటు వికిపీడియా కి విరామం ఇస్తున్నట్టుగా వికిపీడియా సంస్థాపకుడు జిమ్మీ వేల్స్ ప్రకటన చేసారు. ఈ చట్టమే గనక అమలులోకి వస్తే, అందరికీ అందుబాటులో ఉన్న ఇంటర్ నెట్ కి గొళ్ళాలు, తాళాలు, ఇతర దేశాల వివరాల విషయంలో ఆంక్షలు పెట్టటం కోసం ప్రత్యేకంగా టూల్స్ తయారు చెయ్యటం జరుగుతుందన్నది జిమ్మీ వేల్స్ వాదన.

వికిపీడియా సేవలను నిలిపివేయటం ఇది రెండవసారి. ఇంగ్లీషు సైట్ కి మొదటిసారైనా అంతకు ముందు ఇంటర్ నెట్ సెన్సార్ షిప్ ని ప్రతిపాదించిన బెర్లూస్ కోనీ ప్రభుత్వ నిర్ణయానికి వ్యతిరేకంగా ఇటాలియన్ సైట్ ని నిలిపివేయగా, ఆ ప్రతిపాదన ముందుకు పోకుండా ఆగిపోయింది. వికిపీడియాను నిలిపివేసిన సమయంలో, అమెరికాలోని ఇంటర్ నెట్ అభిమానులను అక్కడి కాంగ్రెస్ నాయకుల మీద ఒత్తిడి తెస్తూ మెయిల్స్ పంపించమని జిమ్మీ వేల్స్ కోరుతున్నారు.

వికిపీడియా మీద ఎంతో మంది ఆధారపడ్డరిప్పటికే. పైరసీ వ్యతిరేక చట్టాలు అమలు లోకి రాగానే కొన్ని సైట్ల మీద నిషేధాఙలు కూడా రావొచ్చు. అందువలన, గూగుల్, ఫేస్ బుక్, ట్విట్టర్ లాంటి సంస్థలు వ్యతిరేకిస్తూ ఎంతోమంది ఉపాధులకు ఇది ఎసరుపెడుతుందనే భయాన్ని వ్యక్తపరుస్తున్నారు. ఈ చట్టాల విషయంలో అమెరికా అధ్యక్షుడు ఒబామా బృందం కూడా ఆందోళన వ్యక్తపరుస్తూ, ఆ చట్టాలకు మద్దతునిస్తున్న కాంగ్రెస్ తో మాట్లాడి, పైరసీ ని అడ్డుకుంటూనే వాక్కు పత్రికా స్వాతంత్ర్యాలకు భంగం కలుగని విధంగా వాటిని సవరించే ప్రయత్నం చేస్తామని అంటున్నారు.

-శ్రీజ