Posted: 12/28/2011 06:47 PM IST

లండన్ లో జాతి వివక్ష ఒకటి వెలుగు చూసింది. లాంకాస్టర్ యూనివర్సిటీలో మైక్రో ఎలక్ట్రానిక్స్ చదువుతున్న పూణెకు చెందిన అనుజ్ బిద్వే, కొందరు భారతీయ విద్యార్థులతో కలిసి క్రిస్మస్ శలవుల్లో బయట తిరగటానికి వెళ్ళారు. సిటీ సెంటర్ లో 1.30 ప్రాంతంలో ఇద్దరు తుపాకులతో వారిని సమీపించారు. అందులో ఒకతను అనుజ్ తో ఏదో మాట్లాడి వెంటనే తన దగ్గరున్న గన్ తో అనుజ్ తలకి గురిపెట్టి దగ్గర్నుంచి కాల్చి చంపాడు. ఈ సంఘటనకు నివ్వెరపోయిన బృందంలోని మిగతా వాళ్ళు తేరుకునేటప్పటికే వాళ్ళిద్దరూ పారిపోయారు.

అనుజ్ స్నేహితురాలు సోనాక్షీ సరన్ తన ఫేస్ బుక్ లో ఈ సంఘటనను ఇలా వివరించింది. గన్ లు పట్టుకుని వచ్చిన వారిద్దరు దగ్గరకు వచ్చిన సమయంలో అనుజ్ తన మొబైల్ లో జిపిఎస్ లో మార్గాన్ని చూస్తున్నాడు. వచ్చినవారిలో ఒకడు టైం ఎంతైందని అడిగాడట. అనుజ్ జవాబు చెప్పలేదు అంతే. వెంటనే గన్ తో దగ్గరి రేంజ్ లో కాల్చివేసాడు. హాస్పిటల్ కి తీసుకెళ్తే అనుజ్ మరణించాడని తెలిసింది.

పోలీసు అధికారులు ఈ సంఘటన మీద అప్పుడే ఏమీ చెప్పలేమంటున్నారు. జాతి వివక్ష కూడా అయ్యే అవకాశం ఉందని కూడా అంటున్నారు. అంత దూరంలో ఉన్న కొడుకుని పోగొట్టుకున్న విషాదంలో ఏం చెయ్యటానికీ పాలుపోని అనుజ్ తండ్రి సుభాష్, కొడుకు శవాన్ని త్వరగా పంపించే ఏర్పాటు చెయ్యటంలో తోడ్పడమని మాత్రం అధికారులను అర్థిస్తున్నారు.

-శ్రీజ