Posted: 12/28/2011 01:27 PM IST

గనుల అక్రమ తవ్వకాల కేసులో ఈరోజు సిబిఐ శ్రీలక్ష్మి బెయిల్ రద్దు మీద వేసిన పిటిషన్ విచారణకు రాగా, శ్రీలక్ష్మి దర్యాప్తులో సహకరించటం లేదని, సాక్ష్యులను బెదిరిస్తున్నారని సిబిఐ ఆరోపించింది. శ్రీలక్ష్మి ఆరోగ్యం సరిగ్గా లేక శరీరం సహకరించకపోవటం కాదు ఆమే దర్యాప్తు సంస్థలకు సహకరించటం లేదని సిబిఐ వాదన. శ్రీలక్ష్మిని అరెస్ట్ చేసిన రోజు ఆమె ఏమీ చెప్పటం లేదని, కంటతడిపెట్టుకోవటం, అంతా నాఖర్మ అనటం తప్ప మరేమీ చెయ్యలేదని, ఆ తెల్లవారి సిబిఐ తెలియజేసింది.

ఆరోగ్యం బాగోలేదని ఎవరికి వారికి తెలుస్తుంది, వారిని పరీక్షించిన వైద్యులకు తెలుస్తుంది కానీ దర్యాప్తు సంస్థలకు తెలియటమన్నది కష్టమే. తనమీదనే అభియోగమున్నప్పుడు, తనమీదనే దర్యాప్తు జరుగుతున్నప్పుడు అందులో ఆ నిందితులు సహకరించాలనే నిర్బంధం కూడా న్యాయబద్ధం కాదు. హోం మంత్రి చెప్పినట్టే చేసాను నాకేమీ తెలియదు అన్నది సిబిఐ ఖండిస్తోంది. వారనుకున్నది ఒప్పుకుంటేనే సహకరించినట్టు, వేరే ఏదైనా ప్రకటనలు చేస్తే కొట్టిపారెయ్యటం కరెక్టేనా. ఏ పదవిలోనూ లేని శ్రీలక్ష్మి ఎవరిని ఎలా బెదిరించగలుగుతారు.

పై విషయాలన్నీ సిబిఐ వాదనలకు వ్యతిరేకంగానే ఉన్నాయి. అయినా శ్రీలక్ష్మి బెయిల్ రద్దు అవుతుందా, కొనసాగుతుందా అన్నది వాదోపవాదులు ప్రవేశపెట్టే సాక్ష్యాధారాల మీద ఉంటుంది.  విచారణయితే పూర్తయింది కానీ తీర్పుకి కోర్టు సోమవారం వరకూ వాయిదా పడింది.

-శ్రీజ