Posted: 12/28/2011 11:06 AM IST

ఎట్టకేలకు లోక్ సభలో లోక్ పాల్ బిల్లు ఎలాగోలా పాసయింది. ఇక రాజ్య సభలో చట్టరూపం తీసుకోవటమే తరువాయి. సుదీర్ఘంగా సాగిన చర్చల్లో ప్రతిపక్షాల ప్రతిపాదనలే కాదు ప్రభుత్వ ప్రతిపాదనలు కూడా కొన్ని వీగిపోయాయి. ముఖ్యాంశాలు ఇవి.

సిబిఐ, దేశరక్షణ సిబ్బంది, తీరప్రాంత గస్తీ దళాలు, విదేశ వ్యవహారాలు లోక్ పాల్ నుంచి మినహాయించబడ్డాయి. ఎమ్ పీ లకే కాకుండా మాజీ ఎమ్ పీ లకు కూడా రక్షణ కల్పించారు. ఎమ్ పీలను 5 సంవత్సరాల కాలంలోనే కాకుండా మొత్తం ఏడు సంవత్సరాలు మినహాయింపు ఇవ్వటంతో ఎమ్ పి సీటు ఖాళీ చేసిన తర్వాత మరో రెండు సంవత్సరాల వరకూ లోక్ పాల్ వారి జోలికి రాదు. కార్పొరేట్ రంగం, మీడియా, స్వచ్ఛంద సంస్థలు లోక్ పాల్ లోకి రావు. వీటిని లోక్ పాల్ లోకి రావాలని చేసిన ప్రతిపక్షాల ప్రతిపాదనలు వీగిపోవటంతో అన్నా డిఎమ్ కే, బిజెడి సభ్యులు వాకౌట్ చేసారు. ఓటింగ్ ప్రక్రియకు ముందే, బిఎస్పీ, ఎస్పీ సభ్యులు వాకౌట్ చేసారు. రాష్ట్రస్థాయిలో లోకాయుక్త తప్పనిసరేమీ కాదు. దీన్ని తప్పనిసరి చెయ్యాలని ప్రధానమంత్రి సూచించినా ఆ ప్రతిపాదన వీగిపోయింది.

అన్నిటికన్నా పెద్ద దెబ్బ తగిలింది లోక్ పాల్ కి రాజ్యాంగబద్ధతను కల్పించటంలో. ఎన్నికల కమిషన్ లాగా లోక్ పాల్ కి కూడా రాజ్యాంగబద్ధత ఉండాలన్న రాహుల్ గాంధీ ప్రతిపాదనకూడా వీగిపోవటంతో యుపిఏ ప్రభుత్వం తన సభ్యులతో కూడా ఓటు వేయించుకోలేకపోయినందుకు ప్రధాని, సోనియా, ప్రణబ్ లు కూడా తలవంపులుగా భావించారు. ప్రతిపక్షాలు కూడా ఎద్దేవా చేసాయి.

భాజపా వలనే లోక్ పాల్ కి రాజ్యాంగ బద్దత లభించలేదని, దేశ ప్రజలు వారిని క్షమించరని కాంగ్రెస్ పార్టీ వారిని తూలనాడింది. ఇక రాజ్య సభలో లోకపాలకుల పరిస్థితి ఎలా ఉంటుందో వేచి చూడాల్సిందే.

-శ్రీజ