Posted: 12/19/2011 06:03 PM IST

లోక్ పాల్ బిల్లు మీద తుది నిర్ణయం తీసుకోవటం కోసం ఈ రోజు కేంద్ర మంత్రి వర్గ సమావేశం జరగబోతోంది.  అందులో కీలకమైన లోక్ పాల్ బిల్లు లోని వివాదాత్మక అంశాలను చర్చించి వాటి పట్ల ప్రభుత్వం తమ అంతిమ నిర్ణయానికి ఈ రోజు రాబోతున్నది.  ఇదే కాకుండా సమావేశాల కొనసాగింపులో 27, 28, 29 తేదీల్లో ప్రత్యేక సమావేశాలను నిర్వహించే దిశగా కూడా ప్రభుత్వం యోజన చేస్తున్నది.  ఈ నిర్ణయాన్ని కూడా ఈరోజు మంత్రి వర్గ సమావేశంలో తీసుకుంటారు.

సమావేశాల సమయమా చిక్కిపోయి చివరి దశకు వస్తోంది.  లోక్ పాల్ బిల్లు ప్రవేశపెట్టకపోతే దీక్ష చేస్తానని భీష్మించుకుని అన్నా హజారే కూర్చున్నారు.  ఈ సందర్భంలో ఏ పని చెయ్యాలో ఏది వద్దో అన్న విషయంలో ప్రభుత్వం గందరగోళ స్థితిలో ఉందనే చెప్పాలి.  కనీసం బిల్లుని ప్రవేశపెడితే, ఆమాట చెప్పటానికైనా ఉంటుంది. 

ఈ గందరగోళంలో తెలంగాణా సమస్య కూడా వేడి పుట్టించకుండా రాష్ట్రంలో సమ్మె ఆగిపోవటంతో ఊపిరి పీల్చుకుంటున్నా, ఆ సమస్య కూడా పూర్తిగా అణిగిపోలేదు.  ఆ ప్రస్తావన రాకపోతే వారూ ఊరుకోరు.  కానీ ముందుగా అన్నా కత్తి మెడ మీద వేళ్ళాడుతూ కనిపిస్తోంది.  దాన్నుంచి రక్షించుకోవటం ప్రభుత్వానికి చాలా ముఖ్యం.  ఎందుకంటే అన్నా హజారేకి వస్తున్న మద్దతు రోజురోజుకీ బాగా పెరిగిపోతోంది.    దానికి తోడు ఆయన ప్రభుత్వానికి ఎక్కడా దొరక్కుండా వ్యూహం పన్నుతూ ముందుకెళ్తున్నారు.  తనకోసం ఏదైనా ఆశించేవారిని నయానో భయానో బుజ్జగించో బులిపించో దారికి తెచ్చుకోవచ్చు కానీ తనకంటూ ఏమీ ఆశించకుండా సమాజ సేవకోసమే అంతా చేసేవారితో వేగటం కష్టమేనని ప్రభుత్వం తలవంచుతోంది.

-శ్రీజ