Posted: 12/15/2011 10:42 AM IST

అర్ష ధర్మాన్ని కాపాడుకోవాలని, తిరుపతి వేంకటేశ్వరుని సేవలు సక్రమంగా జరగాలని, తిరుమల ఆధ్యాత్మిక కేంద్రాన్ని పరిరక్షించుకోవలసిన అవసరం ఉందని, పలు పీఠాలకు సంబంధించిన పీఠాధిపతులు, ఇతర స్వాములు నిన్న విశాఖపట్నం ఎమ్ వి పీ కాలనీలోని ఎఎమ్ రాజా మైదానంలో జరిగిని ఆధ్యాత్మిక సదస్సులో తమ ఆకాంక్షను, ప్రస్తుతం తిరుమల కొండ మీద నడుస్తున్న వ్యాపార ధోరణి పై ఆవేదనను వెలిబుచ్చారు.  వికాస తరంగిణి, సహస్ర తులసి శ్రీనివాసమ్ ఆహ్వాన కమిటి సంయుక్తంగా నిర్వహించిన ఆధ్యాత్మిక సదస్సులో పాల్గొన్న ఆధ్యాత్మికి ప్రముఖులంతా తిరుపతి ఆధ్యాత్మిక వైభవాన్నికాపాడాలనే కోరికను ప్రకటించారు. 

ఈ మధ్యకాలంలో తిరుమల తిరుపతి యాజమాన్యం మీద త్రిదండి చిన జీయర్ స్వామి చేసిన వ్యాఖ్యలు అన్ని వర్గాల్లోనూ సంచలనాన్ని సృష్టించిన నేపథ్యంలో, శ్రీపీఠం వ్యవస్థాపకుడు పరిపూర్ణానందస్వామి మాట్లాడుతూ, జియ్యర్ స్వామి ఆవేదనను అర్థం చేసుకోమని, తిరుపతి వేంకటేశ్వరుని సన్నిధిలో జరుగుతున్న అనాచారం ఆగకపోతే తాను ప్రాణత్యాగానికైనా సిద్ధమేనని అన్నారు.  ఫిబ్రవరి 3 భీష్మ ఏకాదశి రోజున కోట్లాదిగా తిరుమలకు తరలివెళ్ళి తిరుమల అభివృద్ధికి తోడ్పడాలని పిలుపునిచ్చారు. 

త్రిదండి చిన రామానుజ జీయర్ స్వామి మాట్లాడుతూ, తిరుపతిని రక్షించుకుంటేనే మనందరికి రక్షణ కలుగుతుందని, కుల మత జాతి వర్గాలకు అతీతంగా ఆవిర్భవించిన క్షేత్రమే తిరుమల వేంకటేశ్వరుని ఆలయమని, అటువంటి ఆలయాన్ని రక్షించుకోవలసిన అవసరం అందరకూ ఉందని అన్నారు.  అహోబల చిన రామానుజ జీయర్ స్వామి మాట్లాడుతూ, ఆధ్యాత్మిక కృషి ఎంతగానో చేసిన రామానుజుడు గురించి చెప్పారు.

సూక్ష్మంగా అందరూ తిరుమల తిరుపతి దేవస్థానం వైఖరిని తప్పుపడుతూ, ధర్మాన్ని రక్షించవలసిన అవసరం ఉందనే అభిప్రాయాన్ని భిన్న స్వరాలలో వినిపించారు. 

-శ్రీజ