Posted: 12/07/2011 01:34 PM IST

     ప్రభుత్వం తీసుకున్న ఎఫ్ డి ఐ నిర్ణయానికి నిరసనగా శీతకాలం పార్లమెంటు సమావేశాలను అడ్డుకుంటూ వస్తున్న ప్రతిపక్షాల పట్టుకి తలవొగ్గిన ప్రభుత్వం ఎట్టకేలకు ఎఫ్ డి ఐ నిర్ణయాన్ని వాయిదా వేసామని ప్రకటించింది. ఈ మేరకు పార్లమెంటులో ప్రకటనను చేసిన ఆర్థిక మంత్రి ప్రణబ్ ముఖర్జీ, ముందు ఈ నిర్ణయాన్ని పక్కకు పెట్టామని నిన్న చెప్పగా అది ప్రతిపక్షాలకు రుచించలేదు. కానీ ఈ రోజు స్పష్టంగా, ఆ నిర్ణయాన్ని వాయిదా వేస్తున్నామని, సర్వసమ్మతితోనే దాన్ని అమలుపరచటం జరుగుతుందని స్పష్టం చెయ్యటంతో ప్రతిపక్షాలు హర్షాన్ని వెలిబుచ్చాయి. రాష్ట్ర ముఖ్య మంత్రులకు, పార్టీలకు సవివరణ ఇచ్చిన తర్వాతనే ఎఫ్ డి ఐ విషయంలో అంతిమ నిర్ణయం తీసుకోవటం జరుగుతుందని ప్రణబ్ ప్రకటించటంతో పార్లమెంటు సమావేశాలకు సానుకూల పరిస్థితులు ఏర్పడుతున్నాయి.

-శ్రీజ