‘హీరోగా సెట్ అయ్యే కథ ఇంకా దొరకలేదు’

Posted: 11/24/2015 12:57 PM IST

దక్షిణాది సినీపరిశ్రమలో మ్యూజిక్ డైరెక్టర్ గా తనకంటూ ప్రత్యేక గుర్తింపు సంపాదించుకున్న దేవీశ్రీప్రసాద్.. కథానాయకుడిగా పరిచయం కానున్నాడనే వార్తలు గతంలో బాగానే చక్కర్లు కొట్టాయి. ఇప్పటికీ ఆయా సందర్భాల్లో ఆ వార్తలు వినిపిస్తూనే వున్నాయి. ఈ విధంగా వెండితెర ఆరంగేట్రంపై వస్తున్న వార్తల విషయాన్ని దేవిశ్రీ దగ్గర ప్రస్తావించగా.. ఆ మ్యూజిక్ డైరెక్టర్ తనదైన శైలిలో స్పందించాడు. తనకు హీరోగా ఎన్నో అవకాశాలు వచ్చినా.. ఆయా స్టోరీలకు తాను సెట్ కానని ఆయా దర్శకనిర్మాతలకు చెప్పానని, అప్పుడు వేరే హీరోలతో ఆ సినిమాలు చేయాల్సిందిగా సూచించానని ఆయన స్పందించాడు. ఈ నేపథ్యంలోనే మరో ఆసక్తికరమైన విషయాన్ని దేవీశ్రీ పంచుకున్నాడు.

నాగచైతన్య - తమన్నా జంటగా వచ్చిన ‘100%లవ్’ మూవీలో నిజానికి తాను హీరోగా చేయాల్సి ఉందన్నాడు దేవీశ్రీప్రసాద్. అయితే, ఈ అవకాశాన్ని తానే వదులుకున్నానని చెప్పాడు. 100%లవ్ సినిమాలో తనను హీరోగా చేయమని డైరెక్టర్ సుకుమార్ కోరారని, ఈ కథకు తాను యాప్ట్ కాదనే తిరస్కరించినట్లు దేవి స్వయంగా తెలిపాడు. ఇలా తనను హీరోగా చేయమని చాలా అవకాశాలు వచ్చాయని, వాటిని తానే రిజక్ట్ చేసి, వేరే హీరోలతో చేయాల్సిందిగా సూచించానని చెప్పాడు. అలా.. తాను వదులుకున్న సినిమాల్లో కొన్ని ఆడియెన్స్ ని బాగానే ఆకట్టుకున్నాయని తెలిపాడు. ఇప్పటికీ హీరోగా నటించాలని తెలుగు, తమిళ భాషల్లో పెద్ద బ్యానర్స్ నుంచి ఆఫర్స్ వస్తున్నాయన్నారు. ప్రముఖ నిర్మాతలు దిల్‌రాజు, అల్లు అరవింద్, జ్ఞానవేళ్ రాజాతోపాటు మరికొందరు ప్రొడ్యూసర్స్ సినిమా కోసం డేట్స్ కేటాయించాల్సిందిగా కోరుతున్నారని చెప్పాడు. అయితే.. తన మనసుకు నచ్చిన కథలు భవిష్యత్తులో దొరకితే తప్పకుండా హీరోగా చేస్తానని తన కోరిక బయటపెట్టాడు దేవీశ్రీ.

ప్రస్తుతం తన దృష్టి సంగీతం పైనే వుందని చెప్పిన దేవి.. ఈ రంగంలో తాను సంపాదించిన క్రేజ్ ని నిలబెట్టుకోవడంపైనే దృష్టి సారించానని స్పష్టం చేశాడు. మరి.. దేవి కోరుకున్న కథ ఎప్పుడు దొరుకుతుందో.. ఆయన్ని డైరెక్ట్ చేసే ఛాన్స్ ఎవరికి దక్కుతుందో.. ఇంతకీ హీరోగా చేస్తాడా లేదా..? అనే విషయాలు సస్పెన్స్ గానే మిగిలిపోయాయి.

AS