మంత్రి చిరంజీవిపై ఫైర్: రాజీనామా

Posted: 08/03/2013 05:45 PM IST

రాష్ట్ర విభజనను నిరసిస్తూ వైయస్ జగన్ వెంట నడుస్తున్న కాంగ్రెసు అనకాపల్లి పార్లమెంటు సభ్యుడు సబ్బం హరి రాజీనామా చేస్తున్నట్లు ప్రకటించారు. తన లోకసభ సభ్యత్వానికి రాజీనామా చేయనున్నట్లు ఆయన తెలిపారు. రెండు, మూడు రోజుల్లో సమైక్యాంధ్ర ఉద్యమంలో పాల్గొంటానని ఆయన చెప్పారు. కేంద్ర మంత్రి చిరంజీవిపై ఆయన తీవ్ర వ్యాఖ్యలు చేశారు. రాష్ట్ర విభజనపై కమిటీ చెప్పిన మాటలు వినాలని చిరంజీవి సూచించడాన్ని ఆయన వ్యతిరేకించారు. "నీ టూరిజం ఏదో చూసుకో, నీ సినిమాలు ఏవో చూసుకో, నీ ఇష్టం వచ్చినట్లు నడుచుకో, కానీ కమిటీ చెప్పినట్లు వినాలని సూచించవద్దు" అని ఆయన చిరంజీవిని ఉద్దేశించి అన్నారు. ప్రజల ఆగ్రహానికి దహనమైపోతారని ఆయన హెచ్చరించారు. హై పవర్ కమిటీ పేరు చెప్పి మోసం చేయడానికి ప్రయత్నిస్తున్నారని, దాన్ని నమ్మవద్దని సబ్బం హరి కేంద్ర సీమాంధ్ర మంత్రులకు సూచించారు. ముందు సిడబ్ల్యుసి తీసుకున్న నిర్ణయాన్ని వెనక్కి తీసుకోవాలని పార్టీ అధిష్టానానికి సూచించాలని, ఆ నిర్ణయాన్ని వెనక్కి తీసుకున్న తర్వాత ఏ కమిటీ ముందైనా కూర్చోవాలని ఆయన అన్నారు. ఆంధ్రప్రదేశ్‌ను విడగొట్టడానికి చేసిన ప్రక్రియ ప్రజాస్వామ్య విరుద్ధంగా జరిగిందని, ప్రజాస్వామ్యం ముసుగులో నియంతృత్వాన్ని పాటించారని ఆయన వ్యాఖ్యానించారు.