విశాఖ ఉక్కుకు తీపీకబురు?

Posted: 04/18/2013 07:37 PM IST

నవరత్న హోదా పరిశ్రమల్లో ఒకటైన విశాఖ ఉక్కు కర్మాగారం ( రాష్ట్రీయ ఇస్పాత్ నిగం లిమిటె-ఆర్ఐఎన్ఎల్) కు మంచి రోజులు రానున్నాయి. ఇంతవరకు సొంత గనులు లేని కారణంగా ఆటు పోట్లు ఎదుర్కొంటున్న పరిశ్రమకు ఆ లోటును రాష్ట్ర ప్రభుత్వం భర్తీ చేసింది. నర్సంపేట, గూడూరు అటవీప్రాతాల్లోని ఇనుప ఖనిజాన్ని విశాఖ స్టీల్‌కు అంకితంచేస్తూ ప్రభుత్వం జీవో జారీచేయడంతో ఇక్కడి ఇనుప ఖనిజ అక్రమ రవాణాకు తెరదించినట్లయింది. ఖమ్మంజిల్లా బయ్యారం గనులను ఉన్న గూడూరు మండలంలోని నేలవంచ, కొంగరగిద్ద అటవీ పరిసరాల్లోని 300 హెక్టార్లలో పూర్తిగా ఐరన్ ఓర్ ఖనిజ నిక్షేపాలున్నాయి. వీటితోకలిపి గూడూరు, నర్సంపేట అటవీరేంజ్‌ల పరిధిలోని మొత్తం 2500 హెక్టార్ల భూమిని విశాఖ స్టీల్‌కు ప్రభుత్వం ధారాదత్తం చేసింది. గూడూరు మండలంలో విలువైన ఖనిజ సంపద ఉంది. ఆ ఖనిజ సంపదను 2004 నుంచి 2009 వరకు యథేచ్ఛగా అక్రమ రవాణా సాగించారు. కొన్ని లక్షల టన్నుల ఇనుప ఖనిజాన్ని అక్రమంగా తరలించిన వారి గుట్టు ట్రాక్టర్ బోల్తాతో బాహ్య ప్రపంచానికి తెలిసింది. అప్పటి వరకు గూడూరు ప్రాంతంలో ఇనుప ఖనిజం ఉన్నప్పటికీ దాని విలువ ఈ ప్రాంత ప్రజలకు తెలియకపోవడంతో ఇక్కడి ప్రజలే ఇనుప ఖనిజం గనుల్లో కూలీలుగా పనిచేసి రాశులుగా పోసిన ఇనుప ఖనిజాన్ని లారీల ద్వారా అక్రమంగా తరలించారు. అయితే బయ్యారం గనులతో ముడిపడి ఉన్న గూడూరు ఖనిజాన్ని కూడా లీజ్ ఉందనే భ్రమలోనే రాజకీయపార్టీల నాయకులు, ప్రజలు ఉండేవారు. 2012 జూన్‌లో రాష్ట్ర ప్రభుత్వం బయ్యారం గనులను రద్దు చేయడంతో అసలు రహస్యం బయటకు వచ్చి గూ డూరు మండలంలోని గనులకు కూడా ఎవరికీ హక్కులేదనేది తేలిపోయింది. గూడూరు రేంజ్ పరిధిలో అత్యధికం గా ఇనుపఖనిజం ఉన్న ప్రాంతాన్ని అధికారులు గుర్తించా రు. వాటిలో అటవీశాఖ కంపార్ట్‌మెంట్ పరిధిలోని 968,69లలో 300 హెక్టార్లు ఉన్నట్లుగా అధికారులు చెబుతున్నారు. ఇది కాకుండా మరో రెండువేల హెక్టార్లలో ఇనుప ఖనిజం నిక్షేపాలున్నట్లు మైనింగ్‌శాఖ అంచనావేస్తోంది. నర్సంపేట డివిజన్‌లోని గూడూరు, కొత్తగూడ, ఖానాపురం మండలాల్లో ఇనుప ఖనిజం భారీ ఎత్తున విస్తరించి ఉం ది. వరంగల్ జిల్లాలో చిట్యాల నుంచి మొదలైన ఐరన్ ఓర్ లేయర్ మల్లంపల్లి ద్వారా నర్సంపేట డివిజన్‌లోని నల్లబెల్లి, ఖానాపురం, కొత్తగూడ, గూడూరు మండలాల ద్వా రా బయ్యారానికి విస్తరించింది. అయితే మల్లంపల్లి గనుల కన్నా నర్సంపేట డివిజన్‌లోని గూడూరు, మండలంలో ఉన్న ఐరన్ గనులు విలువైనవే కాకుండా ఎక్కువ నాణ్యత కలిగి ఉంటుందనేది ఆ శాఖాధికారుల నివేదికలు తెలుపుతున్నాయి.