మరో ఛాలెంజింగ్ పాత్రలో ప్రకాష్ రాజ్

Posted: 06/18/2015 01:31 PM IST

ఇండస్ట్రీలో ఎంతమంది ఆర్టిస్టులు వున్నప్పటికీ.. కొన్ని పాత్రలకు కొందరు మాత్రమే అతికినట్లు సరిపోతారు. అలాంటి వారిలో ప్రకాష్ రాజ్ ఒకరు! ఒక విలన్ గా, హీరోగా, తండ్రిగా, నాన్నగా, తాతయ్యగా.. ఇలా అన్ని పాత్రల్లో ఒదిగిపోయి ప్రేక్షకుల ఆదరణ పొందిన నటుడు. అందుకే.. ఈయనకు కేవలం సౌత్ ఇండస్ట్రీలోనే కాకుండా బాలీవుడ్ నుంచి సైతం అవకాశాలు వెతుక్కుంటూ వస్తాయి. తగిన పాత్రకు ఈయన వుంటేనే సరిపోతారనే ఉద్దేశంతో దర్శకనిర్మాతలు పరుగున ఈయన దగ్గరకు చేరుకుంటారు. ఈ తరహాలోనే తాజాగా సరికొత్త పాత్రలో నటించే ఓ ఆఫర్ ఈయనకు వరించింది. ఆ పాత్రకు ఈయనే కరెక్ట్ అంటూ సదరు దర్శకనిర్మాతలు ఈయన్నే ఎంచుకోవడం జరిగింది.

ఆమధ్య బాలీవుడ్ బొమన్ ఇరానీ, హర్షద్ వార్షీ ముఖ్య పాత్రధారులుగా ‘జాలీ ఎల్.ఎల్.బి’ చిత్రం వచ్చింది. ఆ సినిమా మంచి ఎంటర్ టైనర్ గా ఆకట్టుకుంది! అతి తక్కువ బడ్జెట్ లో తెరకెక్కిన ఆ చిత్రం.. బాక్సాఫీస్ దగ్గర మంచి కలెక్షన్లు రాబట్టి నిర్మాతలకు కాసుల వర్షం కురిపించింది కూడా! ఇప్పుడు ఈ సినిమాని తమిళంలోకి రీమేక్ చేస్తున్నారు. అహ్మద్ దర్శకత్వం వహించనున్న ఈ తమిళ రీమేక్ లో బొమన్ ఇరానీ పాత్రకు ప్రకాష్ రాజ్ ని ఎంచుకున్నారు. ఆ పాత్రలో ప్రకాష్ రాజ్ అతికినట్టుగా సరిపోతారనే ఉద్దేశంతో దర్శకనిర్మాతలు ఆయన్ను ఎంచుకున్నారు. ఈ విషయాన్ని ప్రకాష్ రాజ్ కూడా ట్వీట్ చేశాడు. ఇక హర్షద్ పాత్రను ఉదయనిధి స్టాలిన్ పోషించనున్నాడు.

ఇప్పటికే ఎన్నో వైవిధ్యభరితమైన పాత్రల్లో నటించి ప్రేక్షకులను మెప్పించిన ప్రకాష్ రాజ్.. ఈ చిత్రంలోనూ తన పాత్ర చాలా బాగా వచ్చేందుకు ప్రయత్నిస్తానని పేర్కొంటున్నాడు. ఈ చిత్రంల తనకు ఇంత ఈ ఆఫర్ దక్కడం చాలా సంతోషంగా వుందని చెప్పినట్లుగా సన్నిహిత వర్గాలు తెలిపాయి. మరి.. బాలీవుడ్ లో మంచి విజయం సాధించిన ఈ చిత్రం.. తమిళంలో ఏ మేర లాభాల పంట పండిస్తుందో వేచి చూడాల్సిందే!