మహేష్ బాబు

Posted: 01/21/2015 05:17 PM IST

‘ఆగడు’ చిత్రం బాక్సాఫీస్ దగ్గర బోల్తాపడిన నేపథ్యంలో ప్రిన్స్ మహేష్ బాబు తన తదుపరి చిత్రంపై చాలా జాగ్రత్తలు పాటిస్తున్నట్లు తెలుస్తోంది. ప్రస్తుతం ప్రిన్స్ కొరటాల శివ దర్శకత్వంలో రూపొందుతున్న చిత్రంలో హీరోగా నటిస్తున్న విషయం తెలిసిందే! ఇంకా టైటిల్ ఖరారు చేయని ఈ చిత్రంలో మహేష్ సరసన శృతిహాసన్ హీరోయిన్ గా నటిస్తోంది. రాజేంద్ర ప్రసాద్, జగపతి బాబు, బ్రహ్మానందం ముఖ్య పాత్రలు పోషిస్తున్న ఈ మూవీకి దేవి శ్రీ ప్రసాద్ సంగీత సమకూరుస్తున్నాడు. ప్రస్తుతం ఈ చిత్రానికి ‘శ్రీమంతుడు’ అనే టైటిల్ పరిశీలినలో వుంది.

నిజానికి ఈ చిత్రం ఇప్పటికే షూటింగ్ ముగించుకోవాల్సి వుండేది. ‘ఆగడు’ చిత్రం షూటింగ్ జరుపుకుంటున్న సమయంలో శివ, మహేష్ తమ తదుపరి చిత్రానికి కమిట్ అయ్యారు. అయితే ‘ఆగడు’ డిజాస్టర్’గా నిలవడంతో మహేష్ కాస్త గ్యాప్ తీసుకున్నాడు. అంతేకాదు.. శివ సమకూర్చిన కథలో కాస్త మెరుగులు కూడా దిద్దించాడని సమాచారం! ఇదివరకు చిత్రాలకంటే కాస్త భిన్నంగా వుండే విధంగా మహీ కథను రాయించినట్లు తెలుస్తోంది. తన పాత్ర మేరకే కాకుండా ఇతర ప్రధాన పాత్రలకు సంబంధించి కొద్ది మార్పులు చేసినట్లు ఇండస్ట్రీ టాక్! ఈసారైనా మంచి విజయాన్ని సాధించాలనే ఆశతో మహీ గత పొరపాట్లు మళ్లీ దొర్లకుండా వుండేలా అన్ని ఏర్పాట్లు చేసుకున్నాడట!

ఇకపోతే.. ప్రస్తుతం ఈ చిత్రం షూటింగ్ హైదరాబాద్’లో జరుగుతోంది. ఇప్పటికే చాలా సమయం ఈ మూవీపై వెచ్చించడంతో త్వరగా ముగించేయాలన్న ఉద్దేశంతో శరవేగంగా చిత్రీకరణ జరుపుకుంటున్నట్లు సమాచారం! వేసవి ప్రారంభ సమయానికి షూటింగ్ ముగించేసి, వేసవి చివర్లో విడుదల చేసేలా దర్శకనిర్మాతలు సన్నాహాలు చేస్తున్నట్లు విశ్లేషకులు భావిస్తున్నారు. ‘మిర్చి’లాంటి భారీ విజయాన్ని అందిస్తూ దర్శకుడిగా పరిచయమైన కొరటాల శివ.. అదే తరహాలో ఈ చిత్రాన్ని తెరకెక్కిస్తాడని అభిమానులు కోరుకుంటున్నారు. మైత్రి మూవీస్ పతాకంపై ఈ చిత్రాన్ని యలమంచిలి రవి శంకర్, మోహన్, ఎర్నేని నవీన్ సంయుక్తంగా నిర్మిస్తున్నారు.

AS