Posted: 05/05/2012 06:10 PM IST

 సీనియర్ డైరెక్టర్ దాసరి నారాయణరావు సతీమణి పద్మ కాంస్య విగ్రహాన్ని హైదరాబాద్‌లోని ఆయన స్వగృహంలో ఆవిష్కరించారు. పద్మ గత ఏడాది అక్టోబర్ 28న అనారోగ్యంతో మృతిచెందిన సంగతి తెలిసిందే. కాంగ్రెస్ పార్టీ నాయకురాలిగా, సినీ నిర్మాతగా, సినీ కార్మికులకు ఆత్మబంధువుగా పేరు ప్రఖ్యాతులు పొందిన పద్మ జ్ఞాపకార్థం ఆమె కాంస్య విగ్రహాన్ని తయారుచేయించిన దాసరి నారాయణరావు, తన జన్మదినం సందర్భంగా స్వయంగా తన చేతులు మీదుగానే దాన్ని ఆవిష్కరించారు.

ఇదే సందర్భంగా నిరుడు తాను నెలకొల్పిన నీడ చారిటబుల్ ట్రస్ట్ తరపున 25 మంది పేద, అనాథ విద్యార్థినీ విద్యార్థులకు రూ. 2 లక్షల మేరకు స్కాలర్ షిప్సులు అందజేశారు. ఈ సంగతిని దాసరి తరపున దర్శకులు తమ్మారెడ్డి భరద్వాజ్, రేలంగి నరసింహారావు తెలిపారు. అర్ధాంగి పద్మ మరణించి ఇంకా ఏడాది కాకపోవడంతో ఈసారి జన్మదిన వేడుకలు జరుపుకోకూడదని నిర్ణయించిన దాసరి ఆ మేరకు ప్రకటన కూడా ఇచ్చారు. అయినప్పటికీ సినీ రంగంలోని అనేకమంది ఆయన శ్రేయోభిలాషులు, స్నేహితులు, శిష్యులు, అభిమానులు ఆయనకు జన్మదిన శుభాకాంక్షలు తెలియజేయడానికి వచ్చారు. దాంతో ఆర్భాటం లేకుండా వారి అభినందనలు స్వీకరించారు దాసరి.