నితిన్ సినిమాకు కథను అందించనున్న సుకుమార్

Posted: 11/02/2018 09:02 PM IST

Young hero nitin to act in sukumar story

మెగా పవర్ స్టార్ రాంచరణ్ తేజ్ తో రంగస్థలం లాంటి మంచి హిట్ సినిమాను రూపొందించిన తరువాత కొంత గ్యాప్ తీసుకున్న దర్శకుడు సుకుమార్ మరో మంచి కథకు పదను పెడుతున్నాడు. తెలుగు చిత్ర పరిశ్రమలో అనేక మంది దర్శకుల సరసన కాకుండా ప్రయోగాలు చేసి.. తనకు తాను నిరూపించుకునే దర్శకుడు సుకుమార్. ఆయన మంచి రచయితే కాదు.. అంతకు మించిన దర్శకుడు.

అలాంటి సుకుమార్ తాజాగా అటు నిర్మాణ రంగంలోనూ వేలు పెట్టే ప్రయత్నాలు చేస్తున్నాడని ఇటీవలి కాలంలో వార్తలు వచ్చాయి. ఈ విషయాలు మనకు తెలిసినవే. ఇక యువతకు నచ్చేలా కథాకథనాలను సిద్ధం చేయడంలో ఆయన సిద్ధహస్తుడు. ఇంతకు ముందు ఆయన చేసిన సినిమాలన్నీ ఈ విషయాన్ని నిరూపించినవే. ఆయన కథను అందించిన 'కుమారి 21 ఎఫ్' ఘన విజయాన్ని సాధించింది.

తాజాగా ఆయన మరో సినిమాకి కథాకథనాలను అందించనున్నాడు. ప్రస్తుతం అందుకు సంబంధించిన పనుల్లోనే బిజీగా వున్నాడు. గీతా ఆర్ట్స్ 2 బ్యానర్ పై బన్నీ వాసు ఈ సినిమాకి నిర్మాతగా వ్యవహరించనున్నాడు. 'కుమారి 21 ఎఫ్'ను తెరకెక్కించిన సూర్యప్రతాప్ ఈ సినిమాకి దర్శకుడు. ఈ సినిమాలో హీరోగా నితిన్ చేయనున్నాడు .. త్వరలోనే కథానాయిక ఎంపిక జరగనుంది. గోపీసుందర్ సంగీతాన్ని అందించనున్న ఈ సినిమా త్వరలోనే సెట్స్ పైకి వెళ్లనుంది.