మెగా హీరోకి క్లాప్ కొట్టిన యంగ్ టైగర్

Posted: 01/30/2017 12:31 PM IST

టాలీవుడ్ లో పరిస్థితులు చాలా మారిపోయాయి. ఇంతకు ముందు ఏడాదికి ఒక్క సినిమా రావటమే గగనంగా మారిపోయిన క్రమంలో నాని లాంటి వాళ్లైతే మూడేసి సినిమాల చొప్పున అలరిస్తున్నారు. ఇక సుప్రీం హీరో అని పిలిపించుకుంటున్న సాయి ధరమ్ తేజ్ కూడా రెండు సినిమాలకు తక్కువేం చేయటం లేదు.

గతేడాది సుప్రీం, తిక్క సినిమాలతో మిక్స్ డ్ ఫలితాలను చవిచూసిన సాయి విన్నర్ గా త్వరలో మన ముందుకు రాబోతున్న విషయం తెలిసిందే. రకుల్ హీరోయిన్ గా నటిస్తున్న ఈ సినిమాకు గోపీచంద్ మలినేని దర్శకుడు. ఇదిలా ఉంటే మరో కొత్త సినిమాను కూడా మొదలుపెట్టేశాడు తేజూ. బీవీఎస్ రవి దర్శకత్వంలో జవాన్ అనే ఓ సినిమా అఫీషియల్ గా లాంఛ్ అయ్యింది.

అయితే ఈ సినిమా ఓపెనింగ్ ఫంక్షన్ నందమూరి బాలకృష్ణ చీఫ్ గెస్ట్ గా వస్తాడని అంతా అనుకున్నారు. కానీ, యంగ్ టైగర్ ఎన్టీఆర్ హాజరై అందరినీ ఆశ్చర్యపరిచాడు. 'మా జవాన్ మూవీకి తొలి క్లాప్ ను ఎన్టీఆర్ కొట్టడంతో.. ఎగ్జైటింగ్ ప్రారంభం లభించింది. సాయిధరంతేజ్ హీరోగా బీవీఎస్ రవి దర్శకత్వంలో రూపొందనున్న ఈ చిత్రం షూటింగ్ ప్రారంభం కోసం ఎదురుచూస్తున్నా.. మమ్మల్ని ఆశీర్వదించండి' అంటూ చిత్ర యూనిట్ ఫోటోలను షేర్ చేసింది.

మెగా-నందమూరి ఫ్యాన్స్ వార్ కంటిన్యూ అవుతున్న సందర్భంలో ఇలా ఎన్టీఆర్ మెగా హీరో చిత్రానికి క్లాప్ కొట్టడం, ఆపై విషెష్ చెప్పటం స్పెషల్ అట్రాక్షన్ గా మారింది. ఆ మధ్య సాయి ధరమ్ తేజ్-కళ్యాణ్ రామ్ హీరోగా ఓ మల్టీస్టారర్ సినిమా తెరకెక్కేందుకు యత్నాలు జరుతున్నాయన్న వార్త చక్కర్లు కొట్టిన విషయం తెలిసిందే. ప్రస్తుతం ఆ కథ ఇంకా చర్చల దశలోనే ఉన్నట్లు తెలుస్తోంది. ఇక జవాన్ లో హీరోయిన్ గా కృష్ణగాడి వీరప్రేమ గాథ ఫేమ్ మెహ్రీన్ కౌర్ పీర్జాదా నటిస్తోంది.