‘బాల భైరవుడి’కి మాటిచ్చిన రామ్ చరణ్

Posted: 03/16/2015 12:18 PM IST

మెగాపవర్ స్టార్ రామ్ చరణ్ నటించిన ‘మగధీర’ సినిమాలోని కొన్ని డైలాగులను ఇమిటేట్ చేస్తూ ఓ బాలుడు చెప్పిన వీడియో ఇటీవలే సోషల్ మీడియాలో హల్ చల్ చేసిన విషయం విదితమే! ఆ వీడియోను వీక్షించిన చెర్రీ.. ఆ అబ్బాయిని కలవాలని తన కోరిక వెల్లడించాడు. అంతే! వెంటనే మెగాఫ్యాన్స్ రంగంలోకి ఆ బాలుడి ఆచూకీ కొనుగొన్నారు. చెర్రీ ఎట్టకేలకు ఆ బాలుడిని కలుసుకున్నారు.

మహబూబ్ నగర్ జిల్లాలో అయిజకు చెందిన గొర్రెల కాపరి దంపతుల కుమారుడైన ఈ ఎనిమిదేళ్ల పరశురామ్ ని చెర్రీ కలిశాడు. ఈ సందర్భంగా ఆ బాలుడు చెర్రీ ముందు మరోసారి ఆ మగధీర డైలాగులను వల్లెవేసి, మెగాహీరోను ఆకట్టుకున్నాడు. ఆ బాలుడు చెప్పిన డైలాగ్స్ విన్న అనంతరం చెర్రీ అతనిని అభినందింది.. ‘డైలాగులు చెప్పడం కాదు.. నేను నిన్ను చదివిస్తాను.. బాగా చదువుకుంటావా..?’ అని అడిగాడు. అలాగే.. బాగా చదువుకుంటే పెద్దయ్యాక నీతో మరోసారి కలుస్తాన’ని చరణ్ అతడిని మాటిచ్చాడు. అంతేకాదు.. అతనికి ఉద్యోగం కూడా ఇప్పిస్తానని చెప్పాడు.

అయితే.. పరశురాం మాత్రం గుక్కనిలబెట్టకుండా డైలాగులు చెబుతుండడంతో.. ‘బాగుంది… పెద్దయ్యాక ఏమవుదాం అనుకుంటున్నావు?’ అని రామ్ చరణ్ ప్రశ్నించాడు. దానికి ఆ బాలుడు ‘హీరో అవ్వాలనుకుంటున్నా’ అని టక్కున సమాధానమిచ్చాడు. ఆ బాలుడి సమాధానానికి చిరునవ్వు నవ్విన చరణ్.. ‘సరే ముందు నువ్వు బాగా చదువుకో.. హీరోని చేస్తా’ అని మాటిచ్చాడు. అనంతరం ‘ఆరేంజ్’ సినిమాలో తాను ధరించిన టీ షర్టును బహుమతిగా ఆ అబ్బాయికి ఇచ్చాడు.