హన్సిక ముంబై ప్రాపర్టీ.. ఎవరికోసం?

Posted: 01/27/2015 12:23 PM IST

Hansika mumbai big property place orphaned children

స్టార్ హీరోయిన్’గా ఇండస్ట్రీలో అంతగా పేరు సంపాదించకపోయినప్పటికీ బోలెడన్ని సినిమాలో ఫుల్ బిజీగా వున్న హన్సిక.. ఇటీవలే ముంబైలో ఓ భారీ ప్రాపర్టీని కొనుగోలు చేసింది. ఎకరం విస్తీర్ణంలో వున్న ఈ స్థలానికి కోట్లాది రూపాయలు కూడా వెచ్చించింది. ఈ అమ్మడికి తనకంటూ ప్రత్యేకంగా ప్రాపర్టీ వున్నా కూడా ఇప్పుడీ కొత్త ప్రాపర్టీ కొనడం వెనుక కొందరు అనుమానాలు వ్యక్తం చేశారు. దీపం వుండగానే ఇల్లు చక్కదిద్దుకునే పనిలో పడిపోయిందేమోనని కొందరు అంటుంటే.. పెళ్లి కార్యక్రమాలు మొదలుపెట్టిందేమోనని మరికొందరు అభిప్రాయాలు వెల్లడిస్తున్నారు. అయితే.. ఈ విషయమై స్పందించిన హన్సిక.. ఆ ఫ్లాట్ ఎందుకు..? ఎవరి కోసం..? కొన్నదో స్పష్టం చేసింది.

బొద్దుగుమ్మ హన్సిక ఈ స్థలం విషయమై మాట్లాడుతూ.. ‘‘ముంబైలోని శివారు ప్రాంతంలో నేను ఇలాంటి ప్రాపర్టీ కోసం ఎప్పటినుంచో వెతుకుతున్నాను. ఇన్నాళ్లకు దొరికింది. ముంబై నుంచి గంటన్నర ప్రయాణంలో ఈ స్థలం వుంది. చాలా మంచి లొకాలిటీలో దొరికింది. ఈ లొకాలిటీ కోసమే ఇన్నాళ్లు వేచి చూశాను’’ అని స్థలం తీసుకున్నట్లు ధ్రువీకరించింది. అయితే ఈ ప్రాపర్టీ తీసుకున్నది తన కోసమే, తన కుటుంబం కోసమే, లేదా పెళ్లి సంబంధించిన కార్యక్రమాల నేపథ్యంలోగానే తీసుకున్నది కాదని పేర్కొంది. తాను ఇదివరకే దత్తత తీసుకున్న పిల్లల కోసం ఈ స్థలాన్ని కోట్లాది రూపాయలు వెచ్చించి మరీ తీసుకున్నట్లు తెలిపింది.

హన్సిక గతంలో కొందరు అనాథ పిల్లలను దత్తత తీసుకున్న విషయం తెలిసిందే! అయితే.. దీని గురించి ఈ అమ్మడు ఎక్కువగా ప్రచారం చేసుకోలేదు. ఇప్పుడు ఆ పిల్లల కోసమే శాశ్వతంగా ఓ ఆశ్రమం నెలకొల్పడం కోసం ఈ ఫ్లాట్ తీసుకుందని చెప్పింది. ‘‘ఇప్పటికే ఈ స్థలంపై చాలా ఎక్కువ ధనాన్ని వెచ్చించాను. మరిన్ని నిధులు సమకూర్చుకున్న తర్వాత నిర్మాణాన్ని చేపడుతాను. అనాథ పిల్లల కోసం శాశ్వత ఆశ్రమాన్ని నిర్మిస్తాను’’ అని అంటోంది బొద్దుగుమ్మ. ఇంత చిన్న వయస్సులోనే ఇలా పిల్లల క్షేమం కోసం ఓ ఆశ్రమాన్ని నిర్మించడాన్ని చూసి ఇండస్ట్రీ వర్గాలు ఆమెను ప్రశంసలతో ముంచెత్తుతున్నాయి.