Posted: 08/05/2012 08:27 PM IST

      తమిళుల సొత్తుగా మారిన కర్ణాటక సంగీత బాణీలకు అక్షర బద్ధం చేసిన స్వరపండితుడు. తెలుగు నాట శాస్త్రీయ సంగీతాన్ని సరికొత్త దారి పట్టించిన సంగీత విద్వాంసుడు. సంగీతం వింటూనే నొటేషన్  రాసుకునే ప్రతిభ ఆయన సొంతం. వాగ్గేయకారుల సంగీత రచనలు, గీతాలు, స్వరజతులకు సంగీత రచనలను ఏర్చి కూర్చారు శ్రీపాద పినాకపాణి.  భావి తరాలకు ఆ సంగీతాన్ని అందించేందుకు నొటేషన్లను అక్షరబద్ధం చేసి పుస్తక రచనకు శ్రీకారం చుట్టారు. అక్షర బద్ధం చేసిన ఆయన సంగీత నొటేషన్లను తిరుమల తిరుపతి దేవస్థానం నాలుగు సంపుటాలుగా ముద్రించింది. అంతటి సంగీత దిగ్గజం ఇప్పుడు శత వసంతాలను పూర్తి చేసుకున్నారు.. తన వందో పుట్టిన రోజును జరుపుకున్నారు... ఎనిమిదేళ్లుగా మంచం మీద ఉంటున్నా అలనాటి కృతుల బాణీలకు అక్షరబద్ధం చేస్తున్న నిత్య కృషీవలుడు. ఆయన ప్రతిభకు గుర్తుగా పినాకపాణిని తిరుమల తిరుపతి దేవస్థానం ఆయనను ఘనంగా సత్కరించింది...
         వందో వసంతంలోకి అడుగుపెట్టిన ఆయనకు శ్రీజ్ఞాన విద్యా వారధి అనే బిరుదుతో పాటు 10 లక్షల వెయ్యి నూటపదహార్ల నగదు బహుమతిని అందజేసింది. వందో పుట్టిన రోజుని జరుపుకోవడం తనకు ఎంతో ఆనందాన్నిస్తోందని పినాకపాణి అన్నారు. తన సేవలను గుర్తుంచుకొని సన్మానించినందుకు ఆయన టీటీడీకి కృతజ్ఞతలు తెలిపారు.. వైద్యాన్ని వత్తిగా, సంగీతాన్ని ప్రవత్తిగా ఎంచుకొని రెండు రంగాలలోను విశిష్ట సేవలందించిన ఘనత పినాకపాణిదని టిటిడి ఈవో ఎల్వీ సుబ్రహ్మణ్యం అన్నారు. మరోవైపు రాష్ట్ర ప్రభుత్వం, టిటిడి, తెలుగు విశ్వవిద్యాలయాలు కలిసి ఎల్లుండి అనగా.. ఈనెల 7న హైదరాబాద్ రవీంద్ర భారతిలో పినాకపాణి వందో జన్మదిన వేడుకలు నిర్వహించనున్నాయి.

...avnk