Posted: 05/31/2012 05:17 PM IST

      నిజమే.. వై.ఎస్.ఆర్. పార్టీ అధ్యక్షుడు జగన్మోహన్ రెడ్డి తనను బెదిరించడం వాస్తవమేనని సంచలనాల దర్శకుడు రాంగోపాల్ వర్మ తాజాగా ప్రకటించాడు. 'రక్త చరిత్ర  - 2' సినిమా సమయంలో వర్మని జగన్ బెదిరించాడంటూ పార్లమెంటు సభ్యుడు లగడపాటి రాజగోపాల్ ఈ ఉదయం సంచలన ప్రకటన చేసిన సంగతి మనకు తెలిసిందే. ఈ సినిమాలో తనకు సంబంధించిన సన్నివేశాలు ఉంటే సహించనంటూ వర్మని ఆయన హెచ్చరించాడనీ ... తనతో ఈ విషయాన్ని వర్మ స్వయంగా చెప్పాడని రాజగోపాల్ అన్నారు.
       వెంటనే, ఈ వివాదంపై వర్మ స్పందిస్తూ, లగడపాటి వ్యాఖ్యలు నిజమేనంటూ మీడియాకి సమాచారమిచ్చారు. 'రక్త  చరిత్ర' 2 సినిమాలోని కొన్ని సన్నివేశాలను తొలగించాలంటూ జగన్ కి అత్యంత సన్నిహితుడైన ఓ అనుచరుడు తనపై తీవ్రమైన ఒత్తిడి చేశాడనీ ... ఆ కారణంగానే ఆ సినిమాలోని చాలా సన్నివేశాలను తొలగించవలసి వచ్చిందని వర్మ చెప్పారు. తనను పోలిన ఏ పాత్రా సినిమాలో ఉండటానికి వీలు లేదని జగన్ అతని సన్నిహితుని ద్వారా బెదిరించారని వర్మ స్పష్టం చేశారు.  దీంతో ఈ వివాదం అటు రాజకీయ ఇటు సినీ రంగంమీదా పెను ప్రకంపనలు రేకెత్తించే అవకాశం కనిపిస్తోంది.

...avnk