బీజేపీ ఎమ్మెల్యేలది చిల్లర రాజకీయం : తలసాని

Posted: 05/13/2015 04:50 PM IST

సైకిల్ దిగి కారులో సవారి చేస్తున్న మంత్రి తలసాని.. ప్రతి సందర్భంలోనూ సంచలన వ్యాఖ్యలు చేస్తూ నిత్యం వార్తల్లో నలుగుతున్నారు. ముఖ్యంగా తాను రాజకీయ పాఠాలు నేర్చుకున్న తల్లి పార్టీ టీడీపీ మీదే తలసాని తీవ్రస్థాయిలో విమర్శలు చేయడం అందరికీ ఆశ్చర్యాన్ని గురిచేస్తోంది. అటు బీజేపీ పార్టీ మీద కూడా తనదైన రీతిలో కామెంట్లు, ఆరోపణలు చేస్తున్నారు. ఈ క్రమంలోనే ఆయన తాజాగా మరోసారి బీజేపీ పార్టీ ఎమ్మెల్యేల మీద తీవ్ర స్థాయిలో విరుచుకుపడ్డారు.

తెలంగాణ సర్కార్ రాష్ట్రంలో ‘స్వచ్ఛ హైదరాబాద్’, ‘స్వచ్ఛ తెలంగాణ’ వంటి కార్యక్రమాలను చేపడుతున్న విషయం తెలిసిందే! వీటిమీద తెలంగాణ బీజేపీ ఎమ్మెల్యేలు ఇటీవలే కొన్ని విమర్శలు చేశారు. ఆ విమర్వలను తిప్పికొడుతూ మంత్రి తలసాని మండిపడ్డారు. ఈ కార్యక్రమంపై బీజేపీ ఎమ్మెల్యేలు చిల్లర రాజకీయం చేస్తున్నారని ఆయన ఆరోపించారు. తెలంగాణ రాష్ట్రంలో తమ అస్థిత్వం కోల్పోతామన్న భయంతోనే బీజేపీ లొల్లి చేస్తోందని వ్యాఖ్యానించారు. ఆ రెండు కార్యక్రమాలకు ప్రతి నియోజకవర్గానికి చెందిన ఎమ్మెల్యేనే ప్రాతినిధ్యం వహిస్తారని తలసాని మీడియా సమావేశంలో వెల్లడించారు.

ఈ సందర్భంగానే ఆయన ‘అప్పాయింట్’ వ్యవహారం గురించి కూడా మాట్లాడారు. ఇటీవలే సీఎం కేసీఆర్ ని కలిసేందుకు బీజేపీ ఎమ్మెల్యేలు అప్పాయింట్ మెంట్ కోరగా.. ఆయన ఇవ్వలేదంటూ ఆవేదన వ్యక్తం చేసిన వ్యవహారం విదితమే! అయితే.. సీఎం అప్పాయింట్ మెంట్ కోసం అసలు వారు కలవనేలేదని తలసాని పేర్కొన్నారు.