అది బూటకపు ఎన్ కౌంటర్ : అసదుద్దీన్ ఒవైసీ

Posted: 04/08/2015 04:02 PM IST

ఇటీవలే వరంగల్ జిల్లా జనగామ వద్ద వికారుద్దీన్ తోపాటు అతడి నలుగురు సహచరులను పోలీసులు ఎన్ కౌంటర్ లో కాల్చి చంపేసిన విషయం తెలిసిందే! నిందితులు తమపై దాడి చేయడానికి యత్నించగా.. ఆత్మ రక్షణకోసం వారిమీద కాల్పులు చేసినట్లుగా ఎస్కార్ట్ పోలీసులు ఇప్పటికే వివరించారు కూడా! అయితే.. ఈ ఎన్ కౌంటర్ పై పలువురు రాజకీయ నేతలు అనుమానాలు వ్యక్తం చేశారు. ఇది గుజరాత్ ఫేక్ ఎన్ కౌంటర్ లా వుందంటూ కాంగ్రెస్ సీనియర్ నేత దిగ్విజయ్ సింగ్ పేర్కొనగా.. మరోవైపు మజ్లిస్ పార్టీ అధినేత, హైదరాబాద్ ఎంపీ అసదుద్దీన్ ఒవైసీ దీనిని బూటకపు ఎన్ కౌంటర్ గా వర్ణించారు.

ఈ ఎన్ కౌంటర్ పోలీసుల ప్రతీకార హత్యలుగా వున్నాయంటూ అసదుద్దీన్ ఒవైసీ వ్యాఖ్యానించారు. ఐదుగురు అండర్ ట్రయిల్ ఖైదీల ఎన్‌కౌంటర్‌ను తీవ్రంగా ఖండిస్తున్నట్లు మంగళవారం ఓ ప్రకటనలో పేర్కొన్నారు. సూర్యాపేట ఘటనకు ప్రతీకారంగా పోలీసులు చట్టపరిధిని అతిక్రమించి ఐదుగురు ముస్లిం యువకులను ఎన్‌కౌంటర్ పేరుతో హత్య చేశారని ఆయన ఆరోపించారు. ఈ ఘటనపై హైకోర్టు సిట్టింగ్ జడ్జితో న్యాయ విచారణ జరిపించాలని, బూటకపు ఎన్‌కౌంటర్‌కు పాల్పడిన పోలీసు అధికారులపై జాతీయ మానవ హక్కుల కమిషన్ కేసు నమోదు చేయాలని ఆయన డిమాండ్ చేశారు.

AS