అమ్మ రాజీనామా చెయ్యాలి : జేసి

Posted: 12/09/2013 10:12 PM IST

కాంగ్రెస్ సీనియర్‌నేత జేసీ దివాకర్‌రెడ్డి పార్టీ హైకమాండ్‌పై సంచలన వ్యాఖ్యలు చేశారు. అధ్యక్ష పదవికి (అమ్మ) సోనియాగాంధీ రాజీనామా చేయాల్సిందేనని డిమాండ్ చేశారు. అమ్మ ఆరోగ్యం దృష్ట్యా... రాజకీయాలకు ఆమె దూరంగా వుండడమే మంచిదన్నారు. కొత్తవారికి అవకాశం ఇస్తే...పార్టీ నిలబడుతుందని తీవ్రస్థాయిలో ధ్వజమెత్తారు. నాలుగు రాష్ట్రాల ఎన్నికల్లో కాంగ్రెస్ ఘోర వైఫల్యం అనంతరం స్పందించిన జేసీ.. ఏఐసీసీ అధ్యక్షురాలుగా ఉన్న సోనియా గాంధీ ఇకనైనా కాంగ్రెస్ నాయకత్వం నుంచి తప్పుకోవాలని డిమాండ్ చేశారు.

 

నాలుగు రాష్ట్రాల్లోనే కాదు.. దేశం మొత్తంగా కాంగ్రెస్ ఖాళీ అవడం ఖాయమని జేసీ తీవ్రంగా వ్యాఖ్యానించారు. కాంగ్రెస్ పార్టీకి ఇక కాలం చెల్లిపోయిందని సంచలన వ్యాఖ్యలు చేశారు. ఆమె తప్పుకుని యువకులకు అవకాశం ఇవ్వాలని జేసీ సూచించారు. సోనియా గాంధీ లేకపోతే పార్టీ లేదనుకోవటం పొరపాటని అన్నారు. 125 ఏళ్ల కాంగ్రెస్ సంస్కృతిలో ఇంకా సీల్డ్ కవర్ సంస్కృతినే కొనసాగిస్తే పార్టీ సర్వనాశనం అయిపోతుందని ఆయన విమర్శించారు. ప్రస్తుతం సమర్ధుడైన నాయకుడికి కాంగ్రెస్ బాధ్యతలను అప్పగించాలన్నారు.

 

నాలుగు నెలల నుంచి కాంగ్రెస్ పని అయిపోయిందని తాను చెబుతూనే‌వున్న విషయాన్ని ఆయన గుర్తుచేశారు. ఆంధ్రప్రదేశ్ రాష్ట్రానికి సోనియా తీవ్రమైన అన్యాయం చేశారంటూ మండిపడ్డారు. విభజన బిల్లును ఆపడానికి ప్రయత్నిస్తున్న సీమాంధ్ర కాంగ్రెస్ ఎంపీలు అవిశ్వాస తీర్మానం నోటీసుపై సంతకాలు చేసినందుకు ధన్యవాదాలు తెలిపారు. రాష్ట్రంలో కొత్తపార్టీ రావాల్సిన అవసరముందని జేసీ స్పష్టంచేశారు. కొత్తపార్టీ రాకుంటే ఇప్పుడున్న కాంగ్రెస్ నేతలు ఎక్కడికి వెళ్తారని అన్నారు. జాతీయస్థాయి పార్టీలకు కాలం చెల్లిందని, దేశంలో ప్రాంతీయ పార్టీల శకం మొదలైందన్నారు.