ఫ్యాన్స్ ఫై ప్రతాపం చూపించాడు

Posted: 09/17/2013 10:34 AM IST

బాలీవుడ్ కండల వీరుడు సల్మాన్ ఖాన్ కి వ్యక్తిగతంగా చాలా మంచోడనే పేరుంది. నాలుగు పదుల వయస్సు వచ్చినా కానీ ఆవేశం మాత్రం తగ్గలేదు. గతంలో ఆవేశంలో తప్పిదాలు చేసి పలుమార్లు వార్తల్లోకి ఎక్కడమే కాకుండా, జైలు శిక్షలు కూడా అనుభవించిన సల్మాన్ తాజాగా ఆవేశపడ్డాడు. తనకు స్టార్ డమ్ ని తీసుకొచ్చిన ఫ్యాన్స్ పైనే తన ఆక్రోశాన్ని వెల్లగక్కి బ్యాడ్ అయ్యాడు. అనారోగ్యంతో ముంబై లీలావతి హాస్పటల్‌వున్న నటుడు దిలీప్‌కుమార్‌ను చూసేందుకు సల్మాన్ వచ్చాడు. హాస్పటల్ నుంచి సల్మాన్ బయటకు వస్తుండగా అభిమానులు, రిపోర్టర్లు ఆయన్ని చుట్టిముట్టారు. మీడియా తనను ప్రశ్నలతో ఇబ్బందిపెడతారని భావించిన హీరో..  వెంటనే అక్కడ్నుంచి వెళ్లిపోవాలని అనుకుని కారులోకెళ్లి కూర్చొన్నాడు. అదే సమయంలో అభిమానులు కారు వద్దకు వచ్చి తమ మొబైల్ కెమెరాలతో హీరో ఫోటోని క్లిక్కు మనిపించారు. తన అనుమతి లేకుండా ఫోటోలు తీయడంతో సల్మాన్‌కు కోపం చిర్రెత్తుకొచ్చింది. కారు విండో తెరిచి... ఓ అభిమాని మొబైల్ తీసుకుని దాన్ని రోడ్డుపై గట్టిగా విసిరి కొట్టాడు. మీడియా ముందు, పబ్లిక్ చూస్తుండగా సల్మాన్ ఇలా ప్రవర్తించడంతో అంతా విస్తు పోయారు. అభిమానుల ఆదరణ వల్లనే స్టార్ హీరోగా ఎదిగి కోట్లు సంపాదించిన సల్మాన్ ఖాన్ వారి పట్ల ఇలా ప్రవర్తించడం ఏమిటని అందరూ మండి పడుతున్నారు. మరి ఇప్పటికైనా సల్మాన్ తన ఆవేశాన్ని తగ్గించుకుంటే మరింత మంచిదని అంటున్నారు.